ბათუმში ენმ-ს საარჩევნო ბანერი დააზიანეს. ამის შესახებ ინფორმაციას აჭარის მაუწყებელი ავრცელებს.
”ნაციონალური მოძრაობის” წევრი მიშა ბოლქვაძე მთავრობის თავმჯდომარეს მიმართავს. მაჟორიტარობის კანდიდატი რეგიონის პირველ პირს მოუწოდებს წინასაარჩევნო გარემო ვანდალური ქმედებების გარეშე წარმართოს.
მიშა ბოლქვაძე ირწმუნება, რომ ორთაბათუმში, გზაზე გუშინ ღამით საარჩევნო ბანერი “ქართული ოცნების” აქტივმა თორნიკე რიჟვაძის დავალებით დააზიანეს. ადგილზე სამართალდამცველები მუშაობენ.
ოპოზიციური პარტიის წევრის თქმით, პარალელურად მიმდინარეობს ამომრჩევლების, ნაციონალური მოძრაობის წევრების დაშინება – გადაბირება, ამის შესახებ პარტია კონკრეტული პირების შესახებ ინფორმაციის გასაჯაროვებას უახლოეს დღეებში აანონსებს. მთავრობის ადმინისტრაციაში ბრალდებას ჯერ არ გამოხმაურებიან.
