„ლელომ” გურჯაანში კიდევ ერთი ორგანიზაცია გახსნა და ადგილობრივებს მაჟორიტარობის კანდიდატი ეკატერინე ქვლივიძე წარუდგინა

237

პოლიტიკურმა გაერთიანებამ „ლელო საქართველოსთვის“ გურჯაანში კიდევ ერთი რაიონული ორგანიზაცია გახსნა. შეხვედრაზე „ლელოს“ მხარდამჭერები და გულშემატკივრები შეიკრიბნენ.

„ლელოს“ პრესსამსახურის ინფორმაციით, რაიონული ორგანიზაციის გახსნას „ლელოს“ თავმჯდომარე მამუკა ხაზარაძე, გურჯაანის, საგარეჯოს, სიღნაღისა და დედოფლისწყაროს მაჟორიტარი დეპუტატობის კანდიდატი ეკატერინე ქვლივიძე და პარტიის სხვა ლიდერები ესწრებოდნენ. ისინი ადგილობრივ მოსახლეობასაც შეხვდნენ, რაიონის პრობლემებზე ისაუბრეს და ის გეგმები განიხილეს, თუ როგორ უნდა დაძლიოს გურჯაანმა არსებული დაბრკოლებები. პარტიის მიერ გავრცელებული ინფორმაციით, „ლელოს“ გურჯაანის რაიონულ ორგანიზაციას გიორგი ედიშერაშვილი უხელმძღვანელებს.

„ლელო საქართველოსთვის“ თავმჯდომარემ მამუკა ხაზარაძემ გურჯაანის მოსახლეობას მიმართა, მოსახლეობას მაჟორიტარი დეპუტატობის კანდიდატი წარუდგინა და რეგიონის განვითარებაზე ესაუბრა.

„გავხსენით კიდევ ერთი წარმომადგენლობა და ასევე, ადგილობრივებს წარვუდგინეთ მათი მაჟორიტარი დეპუტატობის კანდიდატი. ეკატერინე ქვლივიძე არის გამორჩეული სამხედრო მფრინავი დამოუკიდებელ საქართველოში და რაც ყველაზე მთავარია, ადამიანი, რომელსაც შეუძლია, ქვეყნის რეალური ცვლილებები მოახდინოს ხალხის საკეთილდღეოდ. ჩვენ ვართ დაკომპლექტებული სერიოზული პროფესიონალებითა და იმ ადამიანებით, ვინც იცის, როგორ გამოიყვანოს ქვეყანა მდგომარეობიდან, რომელშიც „ქართული ოცნების“ გამო იმყოფება,“- განაცხადა მამუკა ხაზარაძემ.

„ლელოს“ თავმჯდომარემ საარჩევნო დღის განკარგულების გამოცემასა და საარჩევნო კამპანიის აქტიურ ფაზაში გადასვლაზეც ისაუბრა და განაცხადა, რომ პარტიას საარჩევნო კამპანია უკვე დაწყებული აქვს. მისივე თქმით, „ლელომ“ წარადგინა თითქმის ყველა ოლქში მაჟორიტარობის კანდიდატი.

„რამდენიმე კანდიდატი უნდა დავასახელოთ რამდენიმე დღეში. პრაქტიკულად, გასული ვართ საარჩევნო ველზე, მიდის სერიოზული მუშაობა, იმედია ბრძანებაც იქნება გამოცემული. ჩვენ ძალიან სერიოზული შემართებითა და შედეგებით შევხვდებით არჩევნებს მხოლოდ და მხოლოდ გამარჯვების იმედით,“-განაცხადა ხაზარაძემ.

გურჯაანის რაიონული ოფისის გახსნის დროს, მოსახლეობას გურჯაანის, საგარეჯოს, სიღნაღისა და დედოფლისწყაროს მაჟორიტარი დეპუტატობის კანდიდატმა ეკატერინე ქვლივიძემაც მიმართა. მან მზაობა გამოთქვა რეგიონის პრობლემების მოგვარების გზების ძიებაში.

„ვიყო ამ ადამიანების დეპუტატობის კანდიდატი, ძალიან საპასუხისმგებლოა, ამით მე ამაყი ვარ. მზადყოფნას გამოვთქვამ ყველა იმ საკითხში, რაც აწუხებს რეგიონს, რომ ერთად მოვაგვაროთ. დღეიდან მე „ლელოს“ ჯარისკაცი ვარ და აქედან ვიბრძოლებ უკეთესი საქართველოსთვის. ეს არის პროფესიონალთა ჯგუფი და ამაყი ვარ იმ ინოვაციური მიდგომით, რომელიც მათ აქვთ,“- განაცხადა ეკატერინე ქვლივიძემ.