აკაკი საღირაშვილი: ისტორიული პროექტი იწყება ოზურგეთიდან, რომელიც მაღალი ხარისხის ინტერნეტით საქართველოს 1064 დასახლებულ პუნქტს დაფარავს

62

„მსურს ოზურგეთის მოსახლეობას და მთლიანად რაიონს მივულოცო ინტერნეტიზაციის პროექტის დაწყება. ეს არის საქართველოს მთავრობის მიერ შერჩეული საპილოტე რეგიონის 49 დასახლებული პუნქტი, რომლებსაც, მიმდინარე წლის ბოლოს უკვე ექნებათ წვდომა უმაღლესი ხარისხის ოპტიკურ-ბოჭკოვან სწრაფ ინტერნეტთან. ეს არის იმ დიდი პროექტის დასაწყისი, რომელსაც მსოფლიო ბანკთან ერთად ვგეგმავთ და რომელიც გულისხმობს მთელი საქართველოს ინტერნეტიზაციას – ეს არის დაახლოებით 1064 დასახლებული პუნქტი და ნახევარი მილიონი ჩვენი მოსახლის შესაძლებლობა, ისარგებლოს მაღალი ხარისხის ინტერნეტით“ – ამის შესახებ ეკონომიკის მინისტრის მოადგილემ, აკაკი საღირაშვილმა ოზურგეთში გამართულ შეხვედრაზე განაცხადა

ეკონომიკის სამინისტროს ინფორმაციით, შეხვედრაზე გურიის სახელმწიფო რწმუნებულთან და ადგილობრივი ადმინისტრაციული ერთეულების წარმომადგენლებთან ერთად ის საკითხები განიხილეს, რომლებიც მნიშვნელოვანია პროგრამის შეზღუდულ ვადებში შეუფერხებლად განხორციელებისთვის. შეხვედრის მონაწილეებს პროექტის შესახებ დეტალური პრეზენტაცია „ოუფენ ნეტის“ ხელმძღვანელმა, მარიამ სულაბერიძემ წარუდგინა.

აკაკი საღირაშვილის შეფასებით, ინტერნეტიზაციის სახელმწიფო პროგრამა, პრაქტიკულად, არის გარღვევა ამ სფეროში, ვინაიდან აქამდე არც საქართველოში და არც რეგიონში, მსგავსი ხარისხის ინტერნეტი, ასეთ დასახლებულ პუნქტებში არასდროს ყოფილა. „კორონავირუსმა და პანდემიამ უფრო მნიშვნელოვნად გამოაჩინა ის საჭიროება, რომელიც გულისხმობს წვდომას მაღალი ხარისხის ინტერნეტთან, წვდომას ისეთ მომსახურებებთან, როგორიც არის ელექტრონული ჯანდაცვა, ელექტრონული განათლება, ელექტრონული მმართველობა, ელექტრონული კომერცია და სხვა თანამედროვე სერვისები“ – აღნიშნა აკაკი საღირაშვილმა.

„მნიშვნელოვანია, რომ აშენებული ფართოზოლოვანი ინფრასტრუქტურა უზრუნველყოფს ნებისმიერი ოპერატორისთვის თავისუფალი, შეუზღუდავი და არადისკრიმინაციული პირობებით „ღია დაშვების“ მომსახურების მიწოდებას. შემუშავებული მოდელით ოპერატორებს მიეცემათ შესაძლებლობა განავითარონ საკუთარი ქსელები და ბოლო მომხმარებელს მიაწოდონ ხარისხიანი ინტერნეტი“ – განაცხადა “ოუფენ ნეტის“ დირექტორმა, მარიამ სულაბერიძემ.

საყოველთაო ინტერნეტიზაციის პროგრამის საპილოტე რეგიონის შერჩევის კრიტერიუმებისა და თეთრი ზონის სამიზნე გეოგრაფიულ არეალებში არსებული დასახლებული პუნქტებისა და მოსახლეობის რაოდენობის, ასევე პროექტის შემჭიდროებულ ვადებში განხორციელების შესაძლებლობის გათვალისწინებით, საპილოტე პროექტი განხორციელდება გურიის რეგიონის ოზურგეთის მუნიციპალიტეტის ტერიტორიაზე, რომლის ძირითადი პარამეტრებია: დასახლებული პუნქტების რაოდენობა – 49, შინამეურნეობა – 8 516, მოსახლეობის რაოდენობა – 28 576 მოსახლე, ოპტიკური კაბელის საორიენტაციო სიგრძე – – 145 კმ. ფართოზოლოვანი ინფრასტრუქტურის პროექტირება-მშენებლობას „ოუფენ ნეტის“ მიერ კონკურენტული წესით შერჩეული კომპანია „პარვუს ჯგუფი“ განახორციელებს. საპილოტე ქსელის მშენებლობა მიმდინარე წლის ბოლომდე უნდა დასრულდეს.