ოზურგეთის პირველ საჯარო სკოლას სრული რეაბილიტაცია ჩაუტარდა

955

ოზურგეთის პირველი საჯარო სკოლის სრული რეაბილიტაცია განხორციელდა. სექტემბერში სკოლა რეგიონის სხვა 19 საჯარო სკოლასთან ერთად, სრულიად განახლებულ გარემოში მიიღებს მოსწავლეებსა და მათ პედაგოგებს.

პირველი სკოლის ტერიტორიაზე ასევე მიმდინარეობს თანამედროვე ტექნოლოგიებისა და ინოვაციების ცენტრის მშენებლობა.

ჩატარებული სარეაბილიტაციო და სამშენებლო სამუშაოები განათლების, მეცნიერების, კულტურის, სპორტის მინისტრის მოადგილე თამარ ქიტიაშვილმა და გურიის სახელმწიფო რწმუნებულმა ზურაბ ნასარაიამ დაათვალიერეს.

სრულად რეაბილიტირდა 1000 მოსწავლეზე გათვლილი საჯარო სკოლის ორი შენობა, შესაბამისად, დაწყებითი და საშუალო საფეხურის მოსწავლეები სხვადასხვა შენობაში განთავსდებიან.

შშმ პირთათვის ადაპტირებულ შენობაში, სასწავლო სივრცეები, თანამედროვე ტექნოლოგიებით აღჭურვილი ლაბორატორიები, ბიბლიოთეკა, სასადილო, სააქტო და სპორტული დარბაზები მოეწყო.

თანამედროვე სტანდარტების სკოლაში, ოქტომბრიდან ახალი სკოლის მოდელი დაინერგება.

სკოლის ტერიტორიაზე ინოვაციების ცენტრის ამოქმედება, გურიის ახალგაზრდობას სწავლის, თავისუფალი დროის გონივრულად გამოყენების და თანამედროვე ტექნოლოგიების დაუფლების საშუალებას მისცემს.

ოზურგეთის პირველი საჯარო სკოლა ასევე აქტიურად თანამშრომლობს ადგილობრივ პროფესიულ კოლეჯთან „ჰორიზონტი“.

ახალი სასწავლო წლისთვის სკოლის მოსწავლეები განახლებულ ლაბორატორიებში შეძლებენ ისეთ პროფესიებში საკუთარი ძალების მოსინჯვას, როგორიცაა: კულინარია, სტილისტი, საინფორმაციო ტექნოლოგიები და სხვა.