საქართველოს გაერთიანებული წყალმომარაგების კომპანია ოზურგეთის მუნიციპალიტეტში, ანასეულის წყალმომარაგების სისტემის მშენებლობას 2020 წლის ბოლოს დაასრულებს. ამის შესახებ ინფორმაციას წყალმომარაგების კომპანია ავრცელებს.
მათივე ცნობით, წყლის სისტემის მშენებლობის 70 % -მდე შესრულებულია. სამუშაოების ფარგლებში უკვე გაკეთდა ახალი გამანაწილებელი და სადაწნეო ქსელები. ასევე, დასრულდა ერთი ახალი რეზერვუარისა და საქლორატოროს მშენებლობა. როგორც კომპანიაში აცხადებენ, ამ დროისთვის მიმდინარეობს ჭაბურღილის მოწყობისა და ტექნოლოგიური ნაწილის სამუშაოები. მათი ინფორმაციით, ანასეულში, მოძველებული ინფრასტრუქტურის გამო, წყალმომარაგების კუთხით პრობლემები იქმნება. ასევე, სასმელი წყლის დებეტის სიმცირის გამო ბოლო წლებია მოსახლეობას წყალი შეზღუდული გრაფიკით მიეწოდება. წყალმომარაგების კომპანიაში აცხადებენ, რომ პროექტს სახელმწიფო ბიუჯეტიდან 7 მილიონ ლარამდე მოხმარდება. შედეგად, ადგილობრივი მოსახლეობა 24- საათიანი, ხარისხიანი წყალმომარაგებით იქნება უზრუნველყოფილი.
ცნობისთვის, ოზურგეთში, ანასეულის დასახლებაში საპროტესტო აქცია გაიმართა. მოსახლეობის განცხადებით, წყლის მრავალწლიანი პრობლემა დღემდე გადაუჭრელია.
აქციის მონაწილეების თქმით, ვითარება განსაკუთრებით მწვავდება ზაფხულში, როცა, წყალი შრება და მასზე მოთხოვნა კიდევ უფრო იზრდება.
