დღევანდელი მდგომარეობით ხაშურში წყალმომარაგების კომპანია წყლით მხოლოდ ნახევარ ქალაქს უზრუნველყოფს, დანარჩენი მოსახლეობა ჭებით სრგებლობს. ჭის წყალი კი სასმელად უვარგისია, რადგან ხშირ შემთხვევაში კანალიზაციის წყალი უერთდება. Qartli.ge შეეცადა, ამის შესახებ სავარაუდო თარიღი მაინც გაერკვია.
მოსახლეობა გვიყვება, რომ ხაშურს წყლისა და კანალიზაციის პრობლემა 90-იანი წლებიდან აქვს და მიუხედავად არაერთგზის მოთხოვნისა, მათ პრობლემებს არავინ აგვარებს.
“საბჭოთა კავშირის დაშლის შემდეგ, ვინც მაშინ ქალაქს ხელმძღვანელობდა, გასცა ბრძანება, წყალი ყველას არ ეყოფაო და ნახევარ ქალაქს გადაუჭრეს წყლის მილები. მაგისტრალის ერთ მხარეს წყალი აქვს ქალაქს, მეორე მხარეს – არა. მერე ზოგმა ჭები ამოთხარა და ისიც უვარგისია დასალევად. რამდენჯერ შეამოწმეს.” – გვიყვება ერთ-ერთი მცხოვრები.
მერია მოსახლეობას პირდებოდა, რომ 2020 წლის გაზაფხულიდან ყველა უბანს, ყველა ოჯახს სასმელი წყალი და მოწესრიგებული კანალიზაცია ექნებოდა, რომელსაც საფრანგეთის განვითარების სააგენტო დააფინანსებდა. სწორედ ამ მიზეზით უგზოობით შეწუხებულ მოსახლეობას ქუჩების მოწესრიგებაზე უარს ეუბნებოდა და თანხების არამიზნობრივ ხარჯვაზე საუბრობდა.
“ამ ეტაპზე ვერც ერთ ქუჩაზე ასფალტს ვერ დავაგებთ. იცით, რომ 2020 წლიდან ხაშურში წყლისა და კანალიზაციის მასშტაბური პროექტი იწყება და ახლა რომ ჩვენ ასფალტი დავაგოთ რამდენიმე თვეში პროექტის დაწყების გამო ისევ უნდა აყარონ და გადათხარონ. ეს კი თანხების არამიზნობრივ ხარჯვაში ჩაგვეთვლება. სანიაღვრე არხსაც ვერ გავაკეთებთ, რადგან ეს გზის დაგების შემადგენელი ნაწილია, – განაცხადეს მერიაში.
ამჯერად მერიამ “შიდა ქართლის საინფორმაციო ცენტრი” საქართველოს გაერთიანებულ წყალმომარაგების კომპანიაში გადაამისამართა.
“ხაშურის მერიას წყლისა და კანალიზაციის მოსაწესრიგებლად ამ ეტაპზე არაფერი არ აქვს დაგეგმილი. ეს იმდენად დიდი პრობლემაა, რომ ჩვენ არ გვაქვს ამისთვის თანხები. ის პროექტი კი, რომელზეც ადრე გითხარით, ჩვენი არ არის და ვერაფერს გეტყვით. როგორც ჩანს ადრე, როცა ამაზე გესაუბრეთ, რაღაც არასწორად გავიგეთ და უნებურად შეცდომაში შეგიყვანეთ. მიმართეთ წყალმომარაგების კომპანიას, – ამბობენ მერიაში.
გაერთიანებულ წყალმომარაგების კომპანიაში ამბობენ, რომ საფრანგეთის განვითარების სააგენტოს (AFD) უზრუნველყოფით, ქალაქ ხაშურის წყლის ინფრასტრუქტურის განვითარების მხარდასაჭერად მართლაც იგეგმება გარკვეული ინვესტიციის განხორციელება.
“აღნიშნული პროექტის ფარგლებში დაგეგმილია ქალაქ ხაშურის წყალმომარაგებისა და წყალარინების სისტემების რეაბილიტაცია და წყალარინების გამწმენდი ნაგებობის მშენებლობა”, – განაცხადეს წყალმომარაგების კომპანიაში.
თუმცა “შიდა ქართლის საინფორმაციო ცენტრს” ასევე აცნობეს, რომ 2020 წელს მხოლოდ და მხოლოდ საპროექტო სამუშაოების განხორციელებაა დაგეგმილი, მშენებლობა-რეაბილიტაცია კი 2021 წელს დაიწყება.
