ქუთაისის შემოვლითი გზა ორმხრივად გაიხსნა. გარკვეული პერიოდის განავლობაში ავტომაგისტრალზე ტრანსპორტის მოძრაობა მხოლოდ ცალმხრივად იყო შესაძლებელი.
შექმნილი ვითარებიდან გამომდინარე კი, დღეიდან სატრანსპორტო საშუალებები ორმხრივად იმოძრავებენ.
კერძოდ, გზა ორმხრივად გაიხსნა, რათა ქუთაისის ჩაკეტილ ქალაქად გამოცხადების გამო, გადაადგილდნენ სატრანზიტო და სადისტრიბუციო ავტომანქანები, აგრეთვე ის მოქალაქეები, რომლებიც რეგისტრაციის მიხედვით საკუთარ საცხოვრებელ ადგილებს უბრუნდებიან.
ამ დროისთვის ქალაქის მიმართულებით ავტომანქანების გადაადგილება შემცირებულია, მოძრაობენ მხოლოდ სადისტრიბუციო ავტომობილები და სასიცოცხლო მნიშვნელობის ობიექტების თანამშრომლები, რომლებიც ქუთაისში არ ცხოვრობენ.
ქუთაისში 9 ძირითადი საგუშაგო მოქმედებს. იმერეთში სახელმწიფო რწმუნებული ზვიად შალამბერიძე და ქუთაისის მერის მოვალეობის შემსრულებელი დავით ერემეიშვილი ქუთაისში მოწყობილ საგუშაგოებზე დილით იმყოფებოდნენ.
ისინი პირადად გაეცნენ შეზღუდვების დაწესების შემდეგ არსებულ ვითარებას და საგუშაგოებზე მყოფ ძალოვანი უწყებების წარმომადგენლებს გაესაუბრნენ.
საქართველოში საგანგებო მდგომარეობა 10 მაისამდე გახანგრძლივდება. ამასთან, თბილისში, რუსთავში, ბათუმსა და ქუთაისში შესვლა და გასვლა 15 აპრილის 21:00 საათიდან 10 დღით აიკრძალა.
ახალი კორონავირუსის გავრცელების გამო, 21 მარტს საქართველოში საგანგებო მდგომარეობა, ხოლო 31 მარტიდან კი საქართველოს მთელს ტერიტორიაზე კარანტინი გამოცხადდა.
კარანტინის ფარგლებში სრულად იკრძალება ნებისმიერი ტიპის საზოგადოებრივი ტრანსპორტით, მათ შორის, მეტროთი, გადაადგილება. 21 საათიდან დილის 6 საათამდე კი ქვეყნის მასშტაბით კომენდანტის საათი მოქმედებს, რის გამოც გადაადგილება ეზღუდება როგორც ქვეითად, ისე ტრანსპორტით მოსიარულეებს. მათთვის კი, ვისი მუშაობაც ამ პერიოდში აუცილებელია, გადაადგილება სპეციალური საშვებით მოხდება. ყველა მოქალაქეს ქუჩაში გადაადგილებისას, დღის ნებისმიერ დროს, თან უნდა ჰქონდეს პირადობის დამადასტურებელი დოკუმენტი.
გარდა ამისა, სასურსათო მაღაზიებსა და აფთიაქების გარდა, საქართველოში 3 პირზე მეტის შეკრება აიკრძალა.
COVID-19-ის აფეთქება ჩინეთში 2019 წლის დეკემბერში დაიწყო და დღეისათვის ის მსოფლიოს 210 ქვეყანაშია გავრცელებული. ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. ამ დროისთვის კორონავირუსი განსაკუთრებით ევროპის კონტინენტზე მძვინვარებს. საქართველოში ამჟამად COVID-19-ით ინფიცირების 336 შემთხვევაა დაფიქსირებული, საიდანაც 74 უკვე გამოჯანმრთელდა. გარდაცვლილია – 3.
