აჭარის ავტონომიური რესპუბლიკის მთავრობის სხდომაზე თორნიკე რიჟვაძემ რეგიონში მიმდინარე მნიშვნელოვან პროექტებზე, მათ შორის ე.წ. ოცნების ქალაქის შესახებ ისაუბრა.
“დავასრულეთ ძალიან მნიშვნელოვან პროექტზე წინადადებების მიღება. საქმე ეხება ე.წ. მუყაოს ქალაქს. მიმდინარეობს შერჩევა-შეფასების პროცედურები. ჩვენ ძალიან მალე გვეყოლება გამარჯვებული და როგორც დავპირდით მოსახლეობას, წელს თებერვალში დავიწყებთ მშენებლობას. გავაგრძელებთ მუშაობას ობიექტური, სამართლიანი, გამჭვირვალე კრიტერიუმის შემუშავების მიზნით. ეს მოგვცემს საშუალებას ერთხელ და სამუდამოდ გადავჭრათ რეგიონში არსებული ძალიან მნიშვნელოვანი სოციალური გამოწვევა“, – განაცხადა თორნიკე რიჟვაძემ.
აჭარის მთავრობის ცნობით, რამდენიმე თვის წინ აჭარის მთავრობამ ე.წ. მუყაოს ქალაქის ტერიტორიაზე საცხოვრებელი სახლების მშენებლობასთან დაკავშირებით უპრეცედენტო გადაწყვეტილება მიიღო. აღნიშნული პროექტის განხორციელებისთვის 2020 წლის აჭარის ბიუჯეტში გათვალისწინებულია 16 მილიონი ლარი. პირველ ეტაპზე 580 ბინის მშენებლობა განხორციელდება.
“დასრულდა წინადადებების მიღება გამოცხადებულ მშენებლობის ტენდერზე. ამ ეტაპზე მიმდინარეობს შერჩევა-შეფასების პროცედურა. ოცნების ქალაქთან დაკავშირებული საკითხი რეგიონში ერთ-ერთი უდიდესი სოციალური გამოწვევაა, რომელსაც აჭარის მთავრობა ცენტრალურ ხელისუფლებასთან კოორდინაციაში თანმიმდევრულად ახორციელებს.
ე.წ. „ოცნების ქალაქში“ 1700-მდე ოჯახი ცხოვრობს. მათი ნაწილი არის სოციალურად დაუცველი”, – ნათქვამია ინფორმაციაში.
ე.წ. ოცნების ქალაქის მცხოვრებლები კრიტერიუმების გასაჯაროვებას ითხოვენ.
ცნობისთვის, ე.წ. მუყაოს ქალაქში საცხოვრებელი კომპლექსის მშენებლობაზე განმეორებით გამოცხადებულ ტენდერში წინადადებების მიღება დასრულდა. შპს „დაგი“ სამინისტროს კომპლექსის მშენებლობას 38 746 000 ლარად სთავაზობს.
გასული წლის დეკემბერში გამოცხადებული შესყიდვა „მაქრო კონსტრქშენთან“ დოკუმენტაციაში აღმოჩენილი უზუსტობების მიზეზით შეწყდა. შეყიდვისთვის, აჭარის ფინანსთა და ეკონომიკის სამინისტროს 41 მილიონ 468 ათასი ლარი ჰქონდა განსაზღვრული. სამი მრავალბინიანი კორპუსის აგება 2021 წელს უნდა დასრულდეს.
