რა ბედი ელის 25-მდე მოვაჭრეს ქობულეთში? ეს საკითხი ჯერ-ჯერობით გაურკვეველია, რადგან ტერიტორიას სადაც ისინი წლებია ვაჭრობენ აჭარის მთავრობა ყიდის. საუბარია ქობულეთის რკინიგზის სადგურთან არსებულ 19 შენობაზე. ამის შესახებ სიუჟეტი აჭარის მაუწყებელმა მოამზადა.
მედიის თქმით, ფაქტია, რომ მოვაჭრეებთან მოლაპარაკება მთავრობას აუქციონის პირობებში არ ჩაუწერია. არადა ქონების მომავალმა მესაკუთრემ აქ სწორედ სავაჭრო ცენტრი უნდა ააშენოს.
აჭარის ფინანსთა და ეკონომიკის სამინისტროში ამბობენ, რომ მოვაჭრეებს საიჯარო ვადა ამოწურული აქვთ. მერია გარემოვაჭრეების დასახმარებლად მიმართვის შემთხვევაში მზაობას გამოთქვამს. აუქციონი დეკემბრის ბოლოს უნდა დასრულდეს. მთავარი პირობა სავაჭრო ცენტრის აშენება და მილიონი ლარის ინვესტიციის განხორციელებაა. ქონების საწყისი ფასიც 1 000 000 ლარია.
