ბათუმის რივიერაზე, სადაც 5 ცათამბჯენის მშენებლობა იგეგმება ტერიტორია შემოიღობა. რკინის კონსტრუქციები და ღობე სანაპიროს მხრიდან, ეშმაკის ბორბლის მიმართულებით, ნაწილობრივ არის გაკეთებული. ამის შესახებ ინფორმაციას აჭარის მაუწყებელი ავრცელებს.
მაუწყებელი დაინტერესდა მიიღო თუ არა ნებართვა ეკონომიკის სამინისტროსგან და ბათუმის მერიისგან კომპანია “რივიერა ბათუმმა”, რომელიც 6 ჰექტარ ტერიტორიაზე 5 ცათამბჯენის მშენებლობისთვის ნებართვის მოპოვებას, უკვე წელია ბათუმელების ნაწილის დიდი წინააღმდეგობის მიუხედავად ცდილობს.
ბათუმი რივიერას დირექტორის გიორგი კაპანაძის განცხადებით რივიერას ტერიტორიაზე უნდა დაიწყონ სატესტო ხიმინჯების მოწყობა, სწორედ ამიტომ დაიწყეს შემოღობვა. შემოღობვის ნებართვა კაპანაძის თქმით, ბათუმის მერიისგან მიიღო. ინფორმაციას ადასტურებენ მერიაშიც.
”უნდა დავიწყოთ სატესტო ხიმინჯებს მოწყობა. ბოლო ეტაპია და ნიადაგი კიდევ ერთხელ კარგად უნდა გამოვიკვლიოთ. უსაფრთხოების მიზნით ტერიტორია უნდა შემოიღობოს. მით უმეტეს, რომ ტერიტორიის შემოღობვა მაინც დაგვჭირდება მშენებლობის დაწყებამდე, ნებართვა ბუნებრივია გვაქვს. ამ ეტაპზე მშენებლობის ნებართვა არ გვაქვს, თუმცა მშენებლობას ჯერ არც ვიწყებთ. სანამ ნებართვა არ გვექნება, თუმცა თითქმის დარწმუნებული ვარ 99% -ით, რომ მშენებლობის ნებართვას მივიღებთ. იმიტომ რომ ყველა აუცილებელი დოკუმენტი, კვლევა, რაც კი არის გათვალისწინებული ყველაფერი გაკეთებული გვაქვს. სატესტო ხიმინჯებს კი, რაც შეეხება მას, ნებართვა არ სჭირდება, ამასთან დაკავშირებით ჩვენ მივმართეთ შესაბამის უწყებებს და პასუხიც მივიღეთ, ეს სამუშაოები ცალკეულ ნებართვას არ საჭიროებს. ღობეზე ნებართვა ავიღეთ ბათუმის მერიისგან,“- ამბობს „ბათუმის რივიერას“ დირექტორი გიორგი კაპანაძე.
ბათუმის ისტორიულ კონცხზე, ცათამბჯენების მშენებლობის შესახებ ინფორმაცია, “სილქ როუდ ჯგუფმა” გასული წლის ივლისში გაავრცელა და პროექტის საჯარო განხილვაც მოაწყო.
ინფორმაციის გავრცელების პარალელურად, მალევე საზოგადოების ნაწილმა, ისტორიულ ზონაში შეუსაბამოდ მაღალი შენობების აგება გააპროტესტა. მთელი წლის განმავლობაში, სხვადასხვა ფორმით აქციები პროექტის წინააღმდეგ არ შეწყვეტილა. საპროტესტო აქციებში ჩაერთო “საზოგადოება ბათომი”, რომელიც სპეციალისტების დასკვნების საფუძველზე მიიჩნევს, რომ ტერიტორიას ისტორიული დაცვის ზონაშია და იქ 3 სართულიანი შენობებზე მაღალი კორპუსების ჩადგმა შეუსაბამო და უკანონოა.
პროექტის წინააღმდეგ გამოვიდა “მწვანე ალტერნატივაც”, რომელის წევრები თვლიან, რომ შავი ზღვის სანაპიროზე, ამ კონცხზე შესაბამისი კვლევების გარეშე განხორციელება, ეკოლოგიურ რისკებს შეიცავს.
საინიციატივო ჯგუფის – “დაიცავი ბათუმის” წევრები კი (ჯგუფი იმ მოქალაქეებს აერთიანებს, რომლებიც სხვადასხვა დროს “ძველი ბულვარისა” და “რვაფეხას” დაცვის აქციებში იყვნენ ჩართულები- ავტ.) ამბობენ, რომ სანაპიროზე დარჩენილი ერთადერთი ღია სივრცე, ძველი ბათუმის ნაწილი, არ უნდა “ჩაბეტონდეს”.
წლის განმავლობაში, რივიერას საკითხზე ათეულობით ქუჩის აქცია გაიმართა და პერფომანსი მოეწყო. შეგროვდა 800-მდე მოქალაქის ხელმოწერა, რომლებიც გაეროს დაფინანსებით ჩატარებულ მულტიდისციპლინარულ კვლევას ეყრდნობიან, სადაც ეკოლოგიურ საფრთხეებზეა საუბარი.
ხმაური და პროტესტი მოჰყვა ყველა საკრებულოს სხდომას, სადაც პროექტის სხვადასხვა ეტაპის დამტკიცების საკითხი გადიოდა.
დაპირისპირება და მწვავე შეფასებები მოჰყვა ბათუმის მერის ერთპიროვნულ გადაწყვეტილებასაც, რომელმაც ისტორიული დაცვის ზონიდან ამოიღო რივიერას მონაკვეთი და ისე გააგზავნა დასამტკიცებლად საქართველოს კულტურული მემკვიდრეობის სააგენტოში. “ბათომისა” და საინიციატივო ჯგუფის წევრებმა ამის გამო, ბათუმის მერი ლაშა კომახიძე ღიად დაადანაშაულეს ტყუილში, კანონის დარღვევაში და პროექტის ლობირებაში. თვლიდნენ, რომ ლაშა კომახიძემ განზრახ ამოჭრა ეს მონაკვეთი ისტორიული დაცვის ზონის დოკუმენტიდან, პროექტის განხორციელებას პრობლემები რომ არ შექმნოდა მომავალში.
მერმა ბრალდებები კატეგორიულად უარყო. თუმცა ლაშა კომახიძემ არ მალავს რომ პროექტის განხორციელების მომხრეა, მოქალაქეების პროტესტი კი “ცათამბჯენების კომპლექსით” ახსნა. საბოლოოდ მერის მიერ გაგზავნილი პროექტი, კულტურული მემკვიდრეობის დაცვის სააგენტოში იმიტომ დაიწუნეს და არ დაამტკიცეს, რომ ისტორიული დაცვის ზონის დოკუმენტიდან, მეცნიერული დასაბუთების გარეშე იყო ამოღებული რივიერას ნაწილი. (ისტორიული დაცვის ზონა, ბათუმში ამ დრომდე არ არის დამტკიცებული).
პროექტი მოსწონს აჭარის მთავრობის თავმჯდომარე თორნიკე რჟვაძესაც, რომელმაც საინიციატივო ჯგუფის -“დაიცავი ბათუმის” წევრებთან რამდენიმე შეხვედრა გამართა, თუმცა უშედეგოდ. შეხვედრა ამ ჯგუფთან მას შემდეგ გადაწყვიტა, რაც რივიერას საწინააღმდეგო კამპანიის კომენტირებისას, ცნობილი ფრაზა – “ძაღლი ყეფს, ქარავანი მიდის” ახსენა.
მოქალაქეების პროტესტი ოპოზიციის აქციად შეაფასა ბიძინა ივანიშვილმაც. აღსანიშნავია, რომ “სილქ როუდ ჯგუფი” სწორედ ბიძინა ივანიშვილის თანადაფინანსების ფონდის დახმარებით გეგმავს ამ პროექტის განხორციელებას.
“სილქ როუდ ჯგუფის” პოზიცია
რაც შეეხება კომპანიას, ის მოქალაქეებისა და სპეციალისტების პოზიციას კატეგორიულად ემიჯნება. კონკრეტულ ბრალდებებზე “ბათუმი რივიერას” დირექტორს, გიორგი კაპანაძეს პასუხები აქვს. ამბობს, რომ რივიერა მოექცევა თუ არა ისტორიული დაცვის ზონაში, ეს პროექტის განხორციელებას ხელს არ შეუშლის. კაპანაძის მტკიცებით, პრეცენდენტულად რივიერას მიმდებარედ არის განთავსებული ძალიან მაღალი შენობები – “პორტა თაუერი” და “ტექნოლოგიური უნივერსიტეტი”, ამიტომ მათ კანონით აქვთ საშუალება, აქ ცათამბჯენები ააგონ.
რაც შეეხება ეკოლოგიურ საფრთხეებს, “სილქ როუდ ჯგუფის” წარმომადგენლების ინფორმაციით, მათ იტალიურ კომპანიას დაუკვეთეს 100 000 ევროს ღირებულების კვლევა, რომელიც ამ საფრთხეებს აბათილებს. იტალიელი სპეციალისტების მიერ მოკვლეული ინფორმაციის თანახმად, ზღვის სანაპიროზე 5 ცათამბჯენის მშენებლობა საფრთხეს არ წარმოადგენს. “ბათუმი რივიერაში” ირწმუნებიან, რომ მყვინთავების ჩართულობით კონცხის წყლისქვეშა გამოკვლევაც მოხდა.
სწორედ ამ ფაქტის გამო, “დაიცავი ბათუმის” წევრები კომპანიის წარმომადგენლებს სიცრუეში ადანაშაულებენ. ამბობენ, რომ “სილქ როუდ ჯგუფის” მიერვე დაკვეთილ იტალიელების კვლევის ინგლისურენოვან ვერსიაში, საფრთხეების შესახებ წერია. მყვინთავების დახმარებით კი კონცხი არავის შეუსწავლია, რადგან ისინი ქართველი სპეციალისტების კვლევებს დაეყრდნენ, რომლებიც 2018 წლის შემოდგომაზე ჩატარდა.
რისი აშენება სურს ბათუმის ისტორიულ კონცხზე “სილქ როუდ ჯგუფს”?
6 ჰექტარი ტერიტორიაზე, რომელიც “კომპანია “სილქ როუდ ჯგუფის” საკუთრებაა, თავდაპირველად 4 საცხოვრებელი კორპუსის და 2 სასტუმროს აშენება იგეგმებოდა, თუმცა შემდეგ ერთი ცათამბჯენის აშენება გადაიფიქრეს.
პროექტის ფარგლებში იგეგმება იახტკლუბის, ხელოვნური ტბისა და სარეკრეაციო სივრცის მოწყობა.
“რივიერას„ ტერიტორია „სილქ როუდ ჯგუფმა“ 2006 წელს 10,086,000 ლარად საგადასახადო ორგანოს მიერ ორგანიზებულ აუქციონზე შეიძინა.
პირველი ფაზის მშენებლობა 2019 წელს იგეგმება და დაახლოებით სამი წელი გაგრძელდება. მისი სრული ღირებულება, 73. 5 მლნ. დოლარია, ხოლო პროექტირების ფასი – 2.5 მლნ. დოლარზე მეტია.
