ცაგერის მუნიციპალიტეტში სოფელ ლასურიაში მდინარე ცხენისწყალზე ნაპირსამაგრი სამუშაოები მიმდინარეობს.
საავტომობილო გზების დეპარტამენტის ინფორმაციით, ავარიული უბანი, ცაგერის მუნიციპალიტეტის სოფელ ლასურიაში, მდინარე ცხენისწყლის მარცხენა ნაპირზე მდებარეობს.
მდინარის ჭალა-კალაპოტში მიმდინარე აკუმულაციის შედეგად მისი კალაპოტი ხშირად იცვლის ადგილმდებარეობას, რაც ჭალის ზედა ტერასების წარეცხვას იწვევს.
ნაპირის წარეცხვის, მოსახლეობის სასოფლო-სამეურნეო სავარგულებისა და სოფელში შემავალი გრუნტის გზის დაზიანების თავიდან ასაცილებლად ნაპირსამაგრი ნაგებობა მოეწყობა. ამ დროისთვის, ქვანაყარი ბერმის მოწყობის სამუშაოები მიმდინარეობს.
პროექტი სახელმწიფო ბიუჯეტიდან ფინანსდება და მისი ღირებულება 4 657 800 ლარია.
