თბილისში ვაჟა-ფშაველას გამზირზე ახლადმოწყობილ გზაგამოყოფ ზოლზე სარწყავი სისტემა მოეწყო, ამ ეტაპზე კი 150-მდე აღმოსავლურ ჭადარს, ლიქვიდამბარას და არღავანს რგავენ.
თბილისის მერიის ინფორმაციით, ახლადგამწვანებული ზოლი მეტროს შახტის ადგილზე მოეწყო და ვაჟა-ფშაველას სკვერს აგრძელებს.
“იქ, სადაც ახლა ავტომობილები გადაადგილდება, წლების განმავლობაში შეუძლებელი იყო მოძრაობა, რადგან განთავსებული იყო მეტროს გამნიავებელი შახტი. ავტომობილებს ამ კონკრეტული მონაკვეთისთვის გვერდის ავლა უწევდათ და გზა ფიზიკურად არ არსებობდა.
ჩვენ ყველაფერი მოვაწესრიგეთ, შახტიც შევინარჩუნეთ და გადმოტანილია გამწვანებული ზოლის ცენტრალურ ნაწილში. ამ მონაკვეთზე, რომელიც, ფაქტობრივად, გაგრძელებაა ვაჟა-ფშაველას ლამაზი, გრძელი სკვერის, მიმდინარეობს ხე-მცენარეეების რგვა, გაზონის მოწყობა. უახლოეს დღეებში ბილიკის მოწყობის სამუშაოები ჩატარდება და კიდევ ერთი კეთილმოწყობილი სივრცე შეემატება ქალაქს“, – განაცხადა თბილისის მერმა, კახა კალაძემ მიმდინარე სამუშაოების დათვალიერებისას.
მერის მოადგილის, მაია ბითაძის განცხადებით, ადგილზე სამი სხვადასხვა ჯიშის ხე ირგვება.
“დღეს ირგვება 150 ძირი ხე. ძალიან მალე ვაჟა-ფშაველას კვარტლებს და გამზირს ექნება ისეთი გამწვანებული ტერიტორია, რომელიც დამატებით ღირებულებას შესძენს მთელ ამ უბანს. ირგვება სამი ჯიშის ხე, მათ შორის, 6-მეტრიანი ჭადრები. ვფიქრობ, ეს პროექტი უნიკალური იქნება იმ ხეივნის გაგრძელების თვალსაზრისით, რომელიც ვაჟა-ფშაველას გამზირზე იყო“, – განაცხადა მაია ბითაძემ.
