აჭარის მთავრობის თავმჯდომარე თორნიკე რიჟვაძე აცხადებს, რომ უახლოეს წლებში ჩვენ ბათუმში პრაქტიკულად აღარ გვექნება არცერთი ქუჩა, არცერთი უბანი თანამედროვე გზის გარეშე. ინფორმაციას “ინტერპრესნიუსი” ავრცელებს.
როგორც „ინტერპრესნიუსს“ აჭარის მთავრობიდან აცნობეს, თორნიკე რიჟვაძე გაეცნო წლების განმავლობაში მოუწესრიგებელი მაიაკოვსკის ქუჩის სარეაბილიტაციო სამუშაოებს.
3 კმ. სიგრძის ქუჩის რეაბილიტაცია სექტემბრის ბოლოს დასრულდება. ამ ეტაპზე უკვე ქუჩის მოასფალტება მიმდინარეობს. გამოიცვალა და შესაბამისი მეთოდით დამუშავდა გრუნტი, დამონტაჟდა საკანალიზაციო ჭები, მოეწყო ბორდიურები, სანიაღვრე სისტემა და ტროტუარებზე დაიგო ფილები.
პარალელურ რეჟიმში რეაბილიტაცია უტარდება ე.წ. ჭაობის, ბონის, გონიო-კვარიათის დასახლების ქუჩებს. სამუშაოები წლის ბოლომდე დასრულდება.
„წლის განმავლობაში ბათუმის მერია კაპიტალური ტრანსფერების ნაწილში, ასევე მერიის ბიუჯეტით ახდენს 35-ზე მეტი უბნის რეაბილიტაციას და 32 მლნ. ლარზე მეტი იხარჯება ამ მიმართულებით. ეს ნიშნავს, რომ ძალიან მალე, უახლოეს წლებში ჩვენ ბათუმში პრაქტიკულად აღარ გვექნება არცერთი ქუჩა, არცერთი უბანი თანამედროვე გზის გარეშე“ -განაცხადა თორნიკე რიჟვაძემ მაიაკოვსკის ქუჩაზე სარეაბილიტაციო სამუშაოების დათვალიერებისას.
