სამგორის რაიონში სამხედრო დასახლების ტერიტორიაზე გზის რეაბილიტაციას იწყება

852

თბილისის მერმა კახა კალაძემ დედაქალაქის მთავრობის სხდომაზე განაცხადა, რომ სამგორის რაიონში, სამხედრო დასახლების ტერიტორიაზე გზის რეაბილიტაცია იწყება.  მისი თქმით, ტერიტორიაზე ყველა საჭირო სამუშაო განხორციელდება და სამუშაოებისთვის, დაახლოებთ, 2.5 მილიონი ლარი დაიხარჯება.

“ახლა რომელ პროექტზეც ვსაუბრობ, ეს არის სამხედრო დასახლება. ჩვენ ადრეც გვქონდა საუბარი ამაზე. იქ მცხოვრები ადამიანებისთვის ძალიან მძიმე პირობებია. არც გზა არსებობს, არც სანიაღვრეები, არც მოასფალტება. გადათხრილი და გაუბედურებულია ტერიტორია. არაერთი მომართვა იყო და ჩვენ პირობა დავდეთ, რომ ამ პროექტს განვახორციელებდით.

დღეს ვიწყებთ სამუშაოებს, გვყავს გამარჯვებული კომპანია ტენდერში. პროექტით გათვალისწინებულია სანიაღვრე ქსელის, სახანძრო-ჰიდრანტების მონტაჟი, ახალი ბორდიურების მოწყობა, ასევე, კორპუსების მიმდებარედ მოეწყობა ავტოსადგომი. საერთო ჯამში, 35 ათასი კვადრატული მეტრის ასფალტის საფარი დაიგება.

ვფიქრობ, ეს პროექტი ძალიან მნიშვნელოვანია პირველ რიგში იმ მაცხოვრებელთათვის. 4 თვე დასჭირდება სამუშაოების განხორციელებას და დაახლოებით, 2.5 მილიონი ლარი იხარჯება ამ პროექტში“, – განაცხადა კალაძემ.