გარემოს დაცვისა და სოფლის მეურნეობის მინისტრმა ლევან დავითაშვილმა ეკონომიკურ კონფერენციაზე “საქართველო და მსოფლიო 2019 წელს“ სიტყვით გამოსვლისას განაცხადა, რომ საქართველოში 5 ახალი დაცული ტერიტორიის არაგვის და თრუსოს დაცული ლანდშაფტების, ერუშეთისა და რაჭის ეროვნული პარკების, ასევე, რიონის აღკვეთილის დაარსება იგეგმება.
როგორც დავითაშვილმა აღნიშნა, ამჟამად საქართველოში 5 კატეგორიის 86 დაცული ტერიტორიაა, რაც ქვეყნის ტერიტორიის თითქმის 10%-ია.
გარემოს დაცვისა და სოფლის მეურნეობის სამინისტროს ინფორმაციით, 2018 წლის მონაცემებით, დაცულ ტერიტორიებზე ვიზიტორთა რაოდენობამ 1 130 462 ადამიანს მიაღწია, რაც იმას ნიშნავს, რომ 2017 წლის მონაცემებთან შედარებით ვიზიტორთა რაოდენობამ 18%-ით მოიმატა.
ამასთან, მინისტრმა ტყის კოდექსის პროექტზე ისაუბრა და ყურადღება ქვეყნისთვის ტყის მდგრადი მართვის პოლიტიკის მნიშვნელობაზე გაამახვილა.
