ახალციხის მუნიციპალიტეტში ფერსა-მუგარეთის და გიორგიწმინდას მექანიკური სარწყავი სისტემების სარეაბილიტაციო სამუშაოები მიმდინარეობს. ინფორმაციას ინტერპრესნიუსი ავრცელებს.
გარემოს დაცვისა და სოფლის მეურნეობის სამინისტროს ცნობით, ორივე ობიექტზე წყლის სატუმბი სადგურები მოეწყო და შესაბამისი ელექტრო დანადგარებით აღიჭურვა, ჭები და მილხიდები დამონტაჟდა. არხების დაზიანებული მონაკვეთების ნაცვლად კი ახალი ნაწილები მოეწყო. ხოლო, ის მონაკვეთები, რომლებიც დემონტაჟს არ საჭიროებდა და დაგროვილი შლამის გამო წყალს სათანადოდ ვერ ატარებდა, გაიწმინდა და მოწესრიგდა.
სატუმბი სადგურის ტერიტორია შემოიღობება და მოეწყობა სისტემასთან არსებული სხვა ინფრასტრუქტურული ნაგებობები.
ფერსა-მუგარეთისა და გიორგიწმინდას სარწყავ სისტემებზე მიმდინარე სამუშაოები ახალციხის მუნიციპალიტეტში დამატებით 222 ჰექტარ მიწის ფართობს მორწყავს.
გარემოს დაცვისა და სოფლის მეურნეობის სამინისტროს შპს „საქართველოს მელიორაცია“ სამცხე-ჯავახეთში დღეისთვის სამელიორაციო ინფრასტრუქტურის 5 სარეაბილიტაციო პროექტს ახორციელებს, რაც ჯამში რეგიონის 1 315 ჰექტარ სასოფლო-სამეურნეო მიწის ფართობზე გააუმჯობესებს სარწყავი წყლის მიწოდებას.
