გორში სამებისა და ნინოშვილის ქუჩებზე სარებილიტაციო სამუშაოები მიმდინარეობს. ინფორმაციას გორის მუნიციპალიტეტის მერია ავრცელებს.
„2018 წელს გორში საგზაო ინფრასტრუქტურის მოწესრიგება სამებისა და ნინოშვილის ქუჩების რეაბილიტაციით დაიწყო. მიმდინარე წელს ქალაქის მასშტაბით ჯამში 24 ქუჩა კეთილმოეწყობა. მალე დაიწყება სადგურის დასახლებაში დარჩენილი 4 ქუჩის მოწესრიგებაც. ამ უბანში აღნიშნული ქუჩების რებილიტაციასთან ერთად საგზაო ინფრასტრუქტურის მოწერიგებაც სრულდება.“ – აღნიშნა მიმდინარე სამუშაოების დათვალიერებისას კონსტანტინე თავზარაშვილმა.
პროექტების მიხედვით იგეგმება სატრანსპორტო საშუალებების სავალი ნაწილის, საფეხმავლოებისა და სანიაღვრეების რეაბილიტაცია.
გორის მერი ადგილობრივი მოსახლეობასაც გაესაუბრა. მათი განცხადებით, ნინოშვილისა და საამების ქუჩების სრული რეაბილიტაცია ათეული წლებია არ განხორციელებულა. დაზიანებული გზის საფარის გამო, გადაადგილება უჭირდა როგორც სატრანსპორტო საშუალებებს, ასევე ფეხით მოსიარულეებს.
ორივე ქუჩის რეაბილიტაცია ადგილობრივი ბიუჯეტისა და რეგიონში განსახორციელებელი ინფრასტრუქტურული პროექტების ფონდის თანადაფინანსებით ხორციელდება.
სამების ქუჩის რეაბილიტაციის პროექტით გათვალისწინებული სამუშაოების სახელშეკრულებო ღირებულება 590 000, ნინოშვილის ქუჩისა – 894 773 ლარს შეადგენს.
სამების და ნინოშვილის ქუჩებს გორის მაჟორიტარი დეპუტატის იოსებ მაკრახიძის ოჯახის კომპანიები – შპს „იბოლია“ და შპს „შარა“ კეთილმოაწყობენ.
სამების ქუჩის რეაბილიტაცია 3 თვეში, ხოლო ნინოშვილის ქუჩისა 6 თვეში დასრულდება.
