გორის საბავშვო ბაღების დირექტორებსა და პედაგოგებს სამსახურიდან გათავისუფლების შესახებ განცხადების დაწერა მოსთხოვეს – ინფორმაცია ამის შესახებ რადიო „მოზაიკას“ გორში მოქმედი რამდენიმე საბავშვო ბაღის აღმზრდელებმა მიაწოდეს.
მათი თქმით, განცხადებების დაწერის დირექტივა საბავშვო ბაღების მართვის სააგენტოსაგან მიიღეს. მოტივი კი მიმდინარე რეორგანიზაციით აუხსნეს.
საბავშო ბაღების პედაგოგები ამბობენ, რომ რეორგანიზაციით, საბავშვო ბაღების მართვის სააგენტო, სკოლამდელ დაწესებულებებში აღმზრდელების რაოდენობის შემცირებას ცდილობს.
სააგენტოს ხელმძღვანელი ლია კოვზიაშვილი ადასტურებს, რომ რეორგანიზაცია ნამდვილად მიმდინარეობს. მისი განცხადებით, საბავშვო ბაღების მართვის სააგენტოს არცერთი პედაგოგისათვის სამსახურიდან გათავისუფლების შესახებ განცხადების დაწერა არ მოუთხოვია. კოვზიაშვილის განმარტებით, მიმდინარე რეორგანიზაციის გამო, სამსახურიდან გათავისუფლება არავის ემუქრება.
