„ანტიკორუფციული მოძრაობა“ ბათუმის მერიას კორუფციულ გარიგებაში ადანაშაულებს

1191

„ანტიკორუფციული მოძრაობა“ ბათუმის მერიას კორუფციულ გარიგებაში ადანაშაულებს. საქმე ეხება ბათუმის მუნიციპალურ სასაფლაოს, რომელმაც 2015 წელს სამშენებლო კომპანია “მამისონთან“ ხელშეკრულება გააფირმა. ხელშეკრულების მიხედვით კი, დაბა ჩაქვის ტერიტორიაზე ქალაქის ახალი სასაფლაო უნდა გაკეთებულიყო. ინფორმაციას აჭარის ტელევიზია ავრცელებს.

ავანსად კომპანიას სამუშაოების ღირებულების 85%-ი, 2 844 000 ლარი დაერიცხა, თუმცა, ლევან გორგილაძე ირწმუნება, რომ  ადგილზე ინფრასტრუქტურული სამუშაოები არ განხორციელებულა. მისივე განმარტებით, ქალაქში კრიზისია შექმნილი და მიცვალებულის დასაკრძალად ადგილები არ არის.

„ანტიკორუფციული მოძრაობის“ დამფუძნებელი აცხადებს, რომ კომპანიასთან, რომელმაც ნაკისრი ვალდებულებები არ შეასრულა, სახელმწიფომ კიდევ სხვა მსხვილი სატენდერო ხელშეკრულებები გააფორმა.

ბათუმის სასაფლაოების დირექტორი შექმნილ რთულ ვითარებას არ უარყოფს და აცხადებს, რომ  საგვარეულოსა და კერძო ტერიტორიების გარდა დასაკრძალი ადგილი მუნიციპალურ სასაფლაოზე ნამდვილად არ არის და ხშირად დასახმარებლად ხელვაჩაურის მუნიციპალიტეტს მიმართავენ. თუმცა, ჯუმბერ კობალაძე ბრალდებებს კორუფციულ გარიგებასთან დაკავშირებით უარყოფს და აცხადებს, რომ საკითხთან დაკავშირებით  საქმეს პროკურატურა იძიებს.

მისივე განცხადებით, კომპანიამ ჩაქვში მნიშნელოვანი ინფრასტრუქტურული სამუშაოები შეასრულა, თუმცა, ტერიტორია დაიმეწყრა, რის გამოც ახლა უწყება  შესრულებული სამუშაოების ხარისხს იკვლევს. ბათუმის სასაფლაოების დირექტორი აცხადებს, რომ სამხარაულის ექსპერტიზამ ტერიტორია მეწყერსაშიშ ზონად შეაფასა.