სამოქალაქო მოძრაობა „სირცხვილიას” ცნობით, დღეს, 20 ივნისს, რუსთაველის გამზირზე აქციის მონაწილეებს საქართველოს მეგობარი ქვეყნების წარმომადგენლები და ევროპარლამენტარები დისტანციურად მიმართავენ. ეს პოლიტიკოსები არიან:
- ევროპარლამენტის წევრი, „ევროპის სახალხო პარტიის“ თანათავმჯდომარე რასა იუკნევიჩიენე;
- ევროპარლამენტარი ჩეხეთიდან, მარკეტა გრეგოროვა;
- ლიეტუვის პარლამენტის საგარეო საკითხთა კომიტეტის თავმჯდომარე ჟიგიმანტას პავილიონისი;
- ევროპარლამენტის წევრი, ევრონესტის თანათავმჯდომარე, ლიეტუვის ორგზის პრემიერ-მინისტრი ანდრიუს კუბილიუსი;
- ევროპარლამენტარი პოლონეთიდან ანა ფოტიგა.
დღეს, 20 ივნისს, “გავრილოვის ღამის” სამი წლისთავზე, გაიმართება ევროინტეგრაციის მხარდამჭერი აქცია, რომელიც სამოქალაქო მოძრაობა “სირცხვილიამ” დაგეგმა. “შინ ევროპისკენ” – ამ სახელწოდების აქციაზე ქართველი ხალხი ევროპულ არჩევანს კიდევ ერთხელ დააფიქსირებს. ამავე მიზნით აქციები საქართველოს სხვა დიდ ქალაქებშიც იმართება.
რამდენიმე დღის წინ, 9 ივნისს, ევროპარლამენტმა კენჭი უყარა რეზოლუციას საქართველოში მედიის თავისუფლების დარღვევებისა და ჟურნალისტების უსაფრთხოების გამოწვევების შესახებ. დოკუმენტი მოიცავს საქართველოს ყოფილ პრემიერ-მინისტრ ბიძინა ივანიშვილისთვის მიზანმიმართული სანქციების დაწესების განხილვისკენ მოწოდებას. მასში აღნიშნულია, რომ ივანიშვილი თამაშობს “დესტრუქციულ როლს” ქართულ პოლიტიკასა და ეკონომიკაში და აქვს გავლენა “ჟურნალისტებისა და პოლიტიკური ოპონენტების პოლიტიკურად მოტივირებულ დევნასთან დაკავშირებით”.
