“განახლებული რეგიონების“ ფარგლებში საჩხერის მუნიციპალიტეტში ინფრასტრუქტურული სამუშაოები მიმდინარეობს

368

საქართველოს პრემიერმინისტრის მიერ ინიცირებული პროგრამის “განახლებული რეგიონების“ ფარგლებში საჩხერის მუნიციპალიტეტში თავისუფლებისა და მუხრან მაჭავარიანის ქუჩების ტროტუარების, ღობეებისა და ჭიშკრების მოწყობის სამუშაოები მიმდინარეობს.

საჩხერეში “განახლებული რეგიონების” პროექტი გარდამავალია და სახელშეკრულებო ღირებულება 3 377 700 ლარია. სამუშაოებს ტენდერში გამარჯვებული კომპანია შ.პ.ს. “არქიტექსი“ ასრულებს.

“იმერეთის 12-ვე მუნიციპალიტეტში ძალიან ინტენსიური მუშაობა მიმდინარეობს პრემიერ-მინისტრის ინიცირებულ ,,განახლებული რეგიონების” პროექტებზე. ცოტა განსხვავებული პროექტი გვაქვს საჩხერეში. აქ, რეაბილიტაცია უტარდება აკაკი წერეთლის სახლ-მუზეუმთან მისასვლელ ქუჩას. აღნიშნული მონაკვეთი ტურისტული თვალსაზრისითაც ძალიან მნიშვნელოვანია. პროექტი ორწლიანია და ითვალისწინებს მთლიანი ქუჩის რეაბილიტაციას, ჩვენი თანამოქალაქეების ჭიშკრებისა და ღობეების მოპირკეთებას, ასევე ტროტუარების მოწყობას. პროექტის დასრულების შემდეგ, მომავალი წლის ბოლოს ჩვენ, მივიღებთ სრულიად რეაბილიტირებულ და განახლებულ ქუჩას“ – განაცხადა იმერეთის სახელმწიფო რწმუნებულმა, ზვიად შალამბერიძემ.

რეგიონული განვითარებისა და ინფრასტრუქტურის მინისტრის პირველი მოადგილის, ილია ბეგიაშვილის განცხადებით, პროგრამა ,,განახლებული რეგიონები“ საქართველოს ყველა მუნიციპალიტეტში აქტიურად მიმდინარეობს და მასში ცენტრალურ ხელისუფლებასთან ერთად მუნიციპალიტეტებიც ჩართულია. პროექტების იმპლემენტაციას სამინისტროს მუნიციპალური განვითარების ფონდთან ერთად, ადგილობრივი ხელისუფლებაც ახორციელებს. მინისტრის პირველმა მოადგილემ, მშენებლებისგან დეტალური ინფორმაცია მოისმინა და საჩხერეში მიმდინარე სამუშაოები დადებითად შეაფასა.

ხოლო საჩხერის მუნიციპალიტეტის მერმა, ლევან ივანაშვილმა სამუშაოების დათვალიერებისას განაცხადა, რომ მათ მიმდინარეობას პირადად აკონტროლებს.