ცესკო მუნიციპალიტეტების ახლადარჩეული საკრებულოების პირველი სხდომების ჩატარების თარიღს მომდევნო კვირაში დაასახელებს

370

ცენტრალური საარჩევნო კომისია მუნიციპალიტეტების ახლად არჩეული საკრებულოების პირველი სხდომების ჩატარების თარიღს მომდევნო კვირას დაასახელებს.

როგორც ცესკოს სპიკერმა, ნათია იოსელიანმა აღნიშნა, სავარაუდოდ, ცესკო მაქსიმალურ, 30-დღიან ვადას საკრებულოების პირველი სხდომების ჩატარებისთვის არ გამოიყენებს.

„ცენტრალურმა საარჩევნო კომისიამ 13 ნოემბერს შეაჯამა თბილისის მერის არჩევნების მეორე ტური და ასევე შეაჯამა თბილისის საკრებულოს 2021 წლის 2 ოქტომბრის არჩევნების შედეგები. რაც შეეხება საკრებულოების სხდომების მოწვევის თარიღს, საარჩევნო კოდექსის 151-ე მუხლში ცალსახად წერია, რომ შედეგების შეჯამებიდან 1 თვის ვადაში ცესკო იწვევს საკრებულოების პირველ სხდომას. შესაბამისად, 13 ნოემბრის შემდეგ აითვლება 1-თვიანი ვადა. თუმცა, საორიენტაციოდ, ცესკოში სხდომა გაიმართება 22-28 ნოემბრის კვირაში, სადაც განისაზღვრება საკრებულოების პირველი სხდომის მოწვევის თარიღი.

რაც შეეხება მერის უფლებამოსილების შესრულების ვადებს, თარიღი აქაც საარჩევნო კოდექსითაა განსაზღვრული და ეს არის არჩევნების შედეგების შეჯამებიდან მე-11 დღე, მაგრამ აქ არის ერთი განსხვავება – თბილისის მერის არჩევნები ჩვენ შევაჯამეთ 13 ნოემბერს, საიდანაც 11-დღიანი ვადა აითვლება და შევა თბილისის მერის უფლებამოსილება ძალაში, რაც შეეხება ოლქებს, მეორე ტური სადაც ჩატარდა, მერების არჩევნების შედეგებს საოლქო საარჩევნო კომისიები აჯამებდნენ და ის 12 ნოემბერს შეაჯამეს, შესაბამისად, 12 ნოემბრიდან აითვლება ვადები თბილისის გარდა.

ვადა დარღვეული არ არის. ჩემი ინფორმაციით, რაც ამჟამად მაქვს, არა მგონია, ცესკომ საკრებულოების პირველი სხდომის მოწვევის 30 – დღიანი ვადა ბოლომდე გამოიყენოს, თუმცა, დაველოდოთ მომდევნო კვირაში ცესკოს სხდომის გამართვას, სადაც საკრებულოების პირველი სხდომების მოწვევის ვადა დასახელდება“, – განაცხადა ნათია იოსელიანმა.

ცნობისთვის, ოპოზიციური პოლიტიკური პარტიების წარმომადგენლები ცესკოს მოუწოდებენ, დაუყონებლივ მოიწვიოს ახლად არჩეული მუნიციპალიტეტების საკრებულოების პირველი სხდომა, რათა მუშაობას შეუდგნენ, მათ შორის ბიუჯეტის განხილვას და დამტკიცებას. ამასთან, ოპოზიციური პოლიტიკური პარტიები აცხადებენ, რომ ცენტრალური ხელისუფლების დავალებით, საკრებულოების ძველმა შემადგენლობამ მთელი ქვეყნის მასშტაბით, 2022 წლის ბიუჯეტის პროექტის განხილვა დაიწყო და დაჩქარებული წესით მიღებას აპირებენ.