სახელმწიფო უსაფრთხოების სამსახური ხელისუფლების დასამხობად შეთქმულების ფაქტზე ინფორმაციის გავრცელებისა და აუდიოჩანაწერების გასაჯაროების აუცილებლობას განმარტავს.
სუსის განცხადებაში აღნიშნულია, რომ გამოძიების დაწყებას საფუძვლად დაედო მიღებული ინფორმაცია იმის შესახებ, რომ პირთა გარკვეული ჯგუფი ახორციელებდა შეთქმულებას ხელისუფლების დასამხობად.
„გამოძიების ფარგლებში, დაუყონებლივ გატარდა სათანადო ზომები და სასამართლოს განჩინების საფუძველზე ჩატარებული ფარული საგამოძიებო მოქმედებების შედეგად მოპოვებული მტკიცებულებების მხოლოდ ნაწილი, რომლის გასაჯაროებაც მიზანშეწონილად ჩაითვალა, გუშინ იხილა საზოგადოებამ.
გამოძიების დაწყებისა და წარმოების ლეგიტიმური მიზანი გახლავთ დანაშაულის გამოვლენა, აღკვეთა და მის განხორციელებაში ჩართული პირების მიმართ კანონმდებლობით გათვალისწინებული სათანადო ზომების გატარება. ხსენებული მიზნის მისაღწევად, საგამოძიებო ორგანოში ყოველწუთიერ რეჟიმში მიმდინარეობს საგამოძიებო თუ საპროცესო მოქმედებები.
გუშინ გავრცელებულ ჩანაწერში ნათლად გამოჩნდა, თუ როგორ საუბრობდნენ ცალკეული პირები დესტრუქციული ძალების მობილიზებაზე, ავტომანქანებით გზების ჩახერგვაზე, სახელმწიფო უწყებების ბლოკირებასა და შტურმზე და უფრო მეტიც, იმაზე, რომ სასურველი შედეგის მიღწევა სისხლის დაღვრის გარეშე შეუძლებელია. სწორედ ამიტომ მივაწოდეთ საზოგადოებას მოსამართლის განჩინების საფუძველზე მოპოვებული მტკიცებულებები, რაც აგრეთვე მიზნად ისახავდა პრევენციული ღონისძიებების გატარებასა და მოსახლეობის ინფორმირებას კონკრეტული ჯგუფის რეალური მიზნების თაობაზე, რათა მოქალაქეებმა ნებსით თუ უნებლიეთ, მონაწილეობა არ მიიღონ ქმედებაში, რომელიც დანაშაულია და მიმართულია საქართველოს კონსტიტუციით დადგენილი სამართლებრივი წესრიგის წინააღმდეგ“, – აღნიშნულია სუს-ის განცხადებაში.
გამოძიება ინტენსიურ რეჟიმში მიმდინარეობს საქართველოს სისხლის სამართლის კოდექსის 315-ე მუხლის პირველი ნაწილით, რაც სასჯელის სახედ და ზომად ითვალისწინებს თავისუფლების აღკვეთას 5 დან 8 წლამდე ვადით.
სახელმიფო უსაფრთხოების სამსახურმა 29 ოქტომბერს გამოაქვეყნა ვიდეომასალა და განაცხადა, რომ ხელისუფლეის დამხობის მიზნით შეთქუმების ფაქტზე გამოძიება მიმდინარეობს.
