“თელავი უნდა იყოს თვითმმართველი ქალაქი” – თელაველმა არჩილ მჭედლიშვილმა არჩევნებზე ისევ “ცხვარს” მისცა ხმა

679

თელაველმა არჩილ მჭედლიშვილმა, რომელმაც 2017 წელს თელავისთვის თვითმმართველის სტატუსის წართმევის გამო, პროტესტის ნიშნად არჩევნებზე “ცხვარი” დაარეგისტრირა და მოქალაქეებს მოუწოდებდა, ხმა სწორედ “ცხვრისთვის” მეცათ, 4 წლის შემდეგაც, ისევ პროტესტის ნიშნად, კვლავ “ცხვარს” მისცა ხმა.

“თელავი უნდა იყოს თვითმმართველი ქალაქი” – მიაწერა მჭედლიშვილმა პროპორციულ, მაჟორიტარულ და მერობის კანდიდატთა საარჩევნო ბიულეტენებს, გადახაზა ყველა საარჩევნო კანდიდატი და საკუთარი კანდიდატი – “ცხვარი” შემოხაზა.

“რა თქმა უნდა, ვიყავი არჩევნებზე და, რა თქმა უნდა, გავაპროტესტე არჩევნები თვითმმართველი თემი თელავის მუნიციპალიტეტში. იმიტომ, რომ თელავი უნდა იყოს თვითმმართველი ქალაქი!!!!! ბასტა!!!!!!” – წერს სოციალურ ქსელში არჩილ მჭედლიშვილი, რომელმაც აქვე ფოტოც გამოაქვეყნა.

 

შეგახსენებთ, რომ სწორედ 2017 წელს, ადგილობრივი თვითმმართველობის არჩევნებამდე ცოტა ხნით ადრე, ხელისუფლებამ 7 თვითმმართველ ქალაქს, მათ შორის, თელავს, თვითმმართველი ქალაქის სტატუსი კანონის დარღვევით გაუუქმა და ისინი კვლავ სათემო მუნიციპალიტეტებს შეუერთა. 2017 წლის შემდეგ მჭედლიშვილი თელავისთვის სტატუსის აღდგენას ითხოვს.