მერია არაფერ შუაშია, მერიას არანაირი უფლება არ აქვს ბანერის ჩამოხსნის, ან დაკიდების, რეაგირება არ იქნება, ყველას აქვს გამოხატვის უფლება კანონის ფარგლებში“,- ასე აფასებს ჟურნალისტებთან დედაქალაქის მერი კახა კალაძე, გუშინ სოციალურ ქსელში გავრცელებულ ბანერებს, სადაც ოპოზიციის რამდენიმე ლიდერია გამოსახული წარწერით “არა ნაცებს, არა ბოროტებას! არა ღალატს!”
როგორც კალაძე აღნიშნავს, ცნობილია, თუ ვინ განათავსა ბანერი.
“მე პირადად არ მომწონს ეს. ჩემი საარჩევნო კამპანია მაქვს, ყოველთვის ვესაუბრები საზოგადოებას სამომავლო გეგმებზე. ვესაუბრები გამოწვევებზე. დღეს, მაგალითად პრეზენტაცია მქონდა, თუ რას ვაპირებ მომდევნო 4 წლის განმავლობაში სოციალური და ჯანდაცვის მიმართულებით. ისიც გაირკვა ვინ გამოაკრა, ამასთან დაკავშირებითაც არსებობს ინფორმაცია. მერია არაფერ შუაშია, არანაირი უფლება არ აქვს მერიას ბანერის ჩამოხსნის, ან დაკიდების. არაფერი რეაგირება არ იქნება, ყველას აქვს გამოხატვის უფლება კანონის ფარგლებში, არის კომპანია „ალმა“, გაგიგიათ ამასთან დაკავშირებით? რომლის საკუთრებაა ეს ბანერები და ისინი იღებენ გადაწყვეტილებას. მერიას არც გაკვრაში და არც ჩამოხსნაში არანაირი ვალდებულება და უფლება არ აქვს“,- აღნიშავს კალაძე.
ჟურნალისტის კითხვაზე, იმუშავებს თუ არა „სისხლიანი ბანერები“ წინასაარჩევნოდ, კახა კალაძე აღნიშნავს, რომ „ქართული ოცნება“ მოწოდების სიმაღლეზეა, მისი ოჯახის წინააღმდეგ კი ცილისწამება მიმდინარეობს.
„ხომ არ მოგწონთ ეს, რაც გამოკრულია? ისე არ მომწონს მე, ისე არ მომწონს ის კამპანია, რომელსაც თქვენი ტელევიზიების საშუალებით თქვენივე პარტია ახორციელებს. შეგიძლიათ ჩართოთ ტელევიზორი და ნახავთ, საარჩევნო კლიპები, რაც არის შეურაცხყოფა, ცილისწამება, ბოროტება, სიძულვილის ენა, ეს ხართ თქვენ. მაშინ რატომ არ იღებთ ენას?! რატომ არ საუბრობთ ამაზე?! სასიამოვნოა?! „ქართული ოცნება“ და კახა კალაძე არაფერს აკეთებს. „ქართული ოცნება“ დგას მოწოდების სიმაღლეზე, ვერ ნახავთ ჩემ განცხადებას, ოპონენტის, ან ვინმეს წინააღმდეგ სიძულვილის ენა გამომეყენებინოს საარჩევნო კამპანიის დროს განსაკუთრებით. თქვენ, ერთხელ არ გამოსულხართ, ჩემი ოჯახის წინააღმდეგ მიდის ეს ცილისწამების ვიდეო, ჩემი შვილები რა, რეზინის შვილები მყავს გგონიათ?! ეს არის რეალობა!“ – აღნიშნავს კალაძე.
თბილისში გვიან ღამით ბანერი წარწერით “არა ნაცებს, არა ბოროტებას” ისევ გააკრეს, თუმცა, ამჯერად გიორგი გახარიას ფოტო დაამატეს, წარწერას კი “არა ღალატს”.
ბანერზე გამოსახული არიან ექსპრეზიდენტი მიხეილ სააკაშილი, ნაციონალური მოძრაობის თავმჯდომარე ნიკა მელია, პარლამენტის წევრი გუბაზ სანიკიძე, ევროპული საქართველოს თავმჯდომარე გიგა ბოკერია, მთავარი არხის გენერალური დირექტორი ნიკა გვარამია, TV პირველის საინფორმაციო სამსახურის ხელმძღვანელი ნოდარ მელაძე, გირჩი — მეტი თავისუფლების ლიდერი ზურაბ ჯაფარიძე და ყოფილი პრემიერმინისტრი, გიორგი გახარია.
წარწერა: “არა ნაცებს, არა ბოროტებას” თბილისში პირველად 2018 წლის ნოემბერში, საპრეზიდენტო არჩევნების წინ გამოჩნდა. მაშინ სარეკლამო ბილბორდზე ნაციონალური მოძრაობის ყოფილი და მოქმედი ლიდერების ფოტოები იყო გამოსახული, წარწერაზე კი სისხლი ჩანდა. ამ თემაზე საუბრისას ქართულ ოცნებაში ამბობდნენ, რომ ბილბორდი მათი დაკვეთით არ გაკეთებულა და კერძო ინიციატივაა, თუმცა ამის თაობაზე ინფორმირებული იყვნენ.
