სოფლის განვითარების სააგენტოს დირექტორი ილია თამარაშვილი კახეთის მხარის სახელმწიფო რწმუნებულთან, ირაკლი შიოშვილთან ერთად გურჯაანის მუნიციპალიტეტის სოფელ ჩუმლაყში მოწყობილი სამაცივრო მეურნეობა დაათვალიერა და სამუშაო პროცესს ადგილზე გაეცნო. ამის შესახებ ინფორმაციას გარემოს დაცვისა და სოფლის მეურნეობის სამინისტრო ავრცელებს.
მათივე ინფორმაციით, ატმის და ვაშლატამას მოსავლის აღების სეზონის დაწყებიდან დღემდე, ახლადგახსნილი სამაცივრე მეურნეობიდან უკვე განხორციელდა 800 ტონა მოსავლის რეალიზაცია.
სახელმწიფო ფინანსური მხარდაჭერით, ლევან კაციაშვილმა ახალი, თანამედროვე სტანდარტებით აღჭურვილი სამაცივრო მეურნეობა გურჯაანის მუნიციპალიტეტის სოფელ ჩუმლაყში მოაწყო. ჯამურმა ინვესტიციამ 800,000 ლარზე მეტი შეადგინა, მათ შორის, 550,000 ლარი შეღავათიანი აგროკრედიტია. სამაცივრე მეურნეობაში 300 ტონამდე ხილის შენახვაა შესაძლებელი. საწარმოში, მუდმივად 10, სეზონურად 100 ადამიანია დასაქმებული.
„სახელმწიფოს მხარდაჭერით უკვე ასზე მეტი შემნახველი და გადამმუშავებელი საწარმოა შექმნილი; ამ მიმართულებით წელს თანადაფინანსების 51 ხელშეკრულება გაფორმდა. სოფლის განვითარების გრძელვადიანი გეგმით, პრიორიტეტულ მიმართულებად კვლავ რჩება გადამმუშავებელი და შემნახველი ინფრასტრუქტურის მხარდაჭერა. უახლოესი 10 წლის განმავლობაში, დარგის განვითარებისათვის, სახელმწიფო 700 მილიონ ლარზე მეტის დახარჯვას გეგმავს”, – განაცხადა სოფლის განვითარების სააგენტოს დირექტორმა, ილია თამარაშვილმა.
კახეთის მხარის სახელმწიფო რწმუნებულის, ირაკლი შიოშვილის განცხადებით, სოფლის მეურნეობის განვითარების ხელშემწყობი სახელმწიფო პროგრამები მნიშვნელოვანია რეგიონის ეკონომიკური გაძლიერებისთვის.
კახეთის რეგიონში, შეღავათიანი აგროკრედიტის პროექტის ფარგლებში, შემნახველი და სამაცივრო ინფრასტრუქტურის განვითარებისთვის, ჯამში, გაცემულია 84 მილიონ ლარზე მეტი ღირებულების 800-ზე მეტი სესხი, სოფლის განვითარების სააგენტოს გაცემული თანადაფინანსება 10 მლნ ლარზე მეტია.
