აგრომწარმოებლები და გარემოს დაცვისა და სოფლის მეურნეობის სამინისტროს ფერმერთა საინფორმაციო-საკონსულტაციო ცენტრების წარმომადგენლები, FAO-ს მიერ, ევროკავშირის მხარადჭერით გამართულ ტრენინგს დაესწრნენ, თემაზე – თანამედროვე სარწყავი სისტემები. ღონისძიება ENPARD-ის პროგრამის ფარგლებში ჩატარდა.
ამის შესახებ „ინტერპრესნიუსს“ გაეროს სურსათისა და სოფლის მეურნეობის ორგანიზაციის წარმომადგენლობიდან (FAO) აცნობეს.
მათივე ინფორმაციით, ტრენინგი სოფლის მეურნეობაში ეკომეგობრული საირიგაციო სისტემების დანერგვას ეხებოდა და მას საერთაშორისო კონსულტანტი, მარკო თეოდორაკოპულოსი უძღვებოდა. ყურადღება გამახვილდა წვეთოვან სარწყავ სისტემებზე, ეკოგონივრულ, ხარჯის დამზოგავ მეთოდზე, რომელიც საშუალებას აძლევს ფერმერებს, ნაკლები წყლით მაქსიმალური შედეგი მიიღონ.
„წვეთოვანი მორწყვა მსოფლიოს მრავალ ქვეყანში უკვე მიღებული პრაქტიკაა. ქართველ ფერმერებსაც შეუძლიათ უკეთესი შედეგების მიღება, ამ მეთოდის აქტიური გამოყენებით. წვეთოვან მორწყვას შეუძლია მნიშვნელოვნად დაზოგოს რესურსები – წყალი, უპირველეს ყოვლისა, მისი უმცირესი გამოყენებით შესაძლებელია მიწის ტენიანობის შენარჩუნება და გარემოზე ზიანის შემცირება“, – განაცხადა თეოდოტაკოპულოსმა.
მათივე ცნობით, ამ პრობლემასთან გასამკლავებლად, FAO რეგულარულად ატარებს ტრენინგებს ფერმერებისთვის, მწარმოებლებისა და ფერმერთა საინფორმაციო-საკონსულტაციო ცენტრების სპეციალისტებისთვის, რათა მათ კიდევ უფრო მეტად გაავრცელონ ინფორმაცია მთელი საქართველოს მასშტაბით, სასოფლო-სამეურნეო ინოვაციების, მათ შორის წვეთოვანი სარწყალი სისტემის შესახებ.
„ცოდნის ნაკლებობა სოფლის მეურნეობის სექტორში, განსაკუთრებით კი, ინფორმაციის ნაკლებობა თანამედროვე სარწყავი სისტემების შესახებ, ერთ-ერთი მთავარი გამოწვევაა საქართველოს აგროსექტორში. ENPARD-ის პროგრამის ფარგლებში, FAO და ევროკავშირი ამ გამოწვევასთან გამკლავებას ცდილობენ“, – განაცხადა FAO-ევროკავშირის პროექტების კოორდინატორმა, ხავიერ სანს ალვარესმა.
როგორც წყალტუბოს ფერმერთა საინფომაციო-საკონსულტაციო ცენტრის სპეციალისტმა ლია ჭამპურიძემ განაცხადა, „FAO-ს ტრენინგები მნიშვნელოვან როლს ითამაშებს საქართველოს აგროსექტორის მოდერნიზებაში“.
„ჩვენს რეგიონში უკვე ბევრი ფერმერი იყენებს წვეთოვან სარწყავ სისტემებს, როგორც სათბურში, ისე ღია გრუნტზე და საკმაოდ კმაყოფილები არიან შედეგებით. ვფიქრობ, FAO-ს ტრენინგები მნიშვნელოვან როლს ითამაშებს საქართველოს აგროსექტორის მოდერნიზებაში“, – აღნიშნა ლია ჭამპურიძემ.
