თელავში 30 საწოლიანი ფსიქიატრიული საავადმყოფოს მშენებლობა იგეგმება. მთავრობის მიერ დაანონსებული სამედიცინო დაწესებულების მშენებლობა გასულ წლებში უნდა დაწყებულიყო, თუმცა დღემდე ამ საკითხზე არაფერია ცნობილი. ამის შესახებ კახეთის ხმა წერს.
გავრცელებული ინფორმაციით, ფსიქონევროლოგიური დისპანსერის მშენებლობასა და სამედიცინო აპარატურით აღჭურვას საქართველოში ჩინეთის სახალხო რესპუბლიკის საელჩო დააფინანსებს.
ჯანდაცვის სამინისტროში გასულ წელს განმარტავდნენ, რომ ახალი საავადმყოფოს აშენებისა და თანამედროვე სამედიცინო აპარატურით აღჭურვის შემდეგ პაციენტებს სამედიცინო მომსახურების მიღება საუკეთესო პირობებში შეეძლებათ.
,,აღმოსავლეთ საქართველოში არ არის ფსიქიატრიული საავადმყოფო, ამიტომ მოსახლეობას ხშირად უწევს პაციენტების თბილისში განთავსება, რაც იწვევს მგზავრობის დამატებით ხარჯს, ისედაც შეჭირვებულ მოსახლეობას კი კიდევ უფრო მძიმე ტვირთად აწვება და პაციენტების ახლობლებს უჭირთ პაციენტის ნახვა სტაციონარში“. – აცხადებდნენ ჯანდაცვის სამინისტროში.
თელავის მუნიციპალიტეტის მერიაში აცხადებენ, რომ სამშენებლო სამუშაოების დაწყების ვადა არ არის ცნობილი. აღნიშნულ საკითხზე გასულ კვირას ჯანდაცვის მინისტრმა, ეკატერინე ტიკარაძემ გააკეთა განცხადება. მისი თქმით, მთავრობის მიერ წარდგენილი დოკუმენტის ფარგლებში, რომელიც ჯანდაცვის სისტემის განვითარებას ეხება, პროექტის განხორციელება ჩინეთის მიერ გამოყოფილი სახელმწიფო გრანტის მეშვეობით გახდება შესაძლებელი.
“შემუშავდება ახალი მოდელი, რომელიც სრულად იქნება მორგებული მოქალაქის ბიო-ფსიქო-სოციალურ საჭიროებებზე. ჩინეთის სახელმწიფოს გრანტის ფარგლებში რეგიონებში იგეგმება 2 ახალი ფსიქიატრიული საავადმყოფოს მშენებლობა და თბილისის 2 ფსიქიატრიული საავადმყოფოს რეაბილიტაცია. მოხდება სახელმწიფო საკუთრებაში არსებული ჰოსპიტალური ქსელის გაძლიერებაც, რომელიც მაღალი ხარისხი სერვისის მიწოდებით, პაციენტის ჯანმრთელობას უზრუნველყოფს,” – განაცხადა ეკატერინე ტიკარაძემ.
მინისტრმა სამინისტროს 10-წლიანი გეგმა, რესპუბლიკურ საავადმყოფოში, 7 ივლისს წარადგინა.
