პროგრამა „აწარმოე საქართველოში“ ფარგლებში სესხის თანადაფინანსებით, საკრედიტო-საგარანტიო სქემით და გრანტით წავახალისებთ აგროტურიზმს და ეკოტურიზმს, – ამის შესახებ ეკონომიკისა და მდგრადი განვითარების მინისტრმა ნათია თურნავამ საქართველოს ეკონომიკური განვითარების 10-წლიანი გეგმის პრეზენტაციაზე განაცხადა.
მინისტრის განცხადებით, ეს იქნება კომპლექსური დახმარება ფერმერისთვის, რომელსაც აქვს თუნდაც მცირე ფერმერული მეურნეობა და გადაწყვეტს, რომ მცირე სასტუმრო, რესტორანი, კაფე ან სხვა ტურისტული ობიექტი განავითაროს პარალელურად.
„ახლა, პოსტპანდემიურ პერიოდში ღია სივრცეში ტურისტული პროდუქტები და ადგილები უფრო მოთხოვნადი იქნება და ეს არის ის პროგრამა, რომელიც რეგიონებში გაიშლება“, – აღნიშნა ნათია თურნავამ.
ნათია თურნავას განცხადებით, აგრო და ეკოტურიზმის სექტორს სახელმწიფო პერსონალის ტრენინგსა და ინფოტურების მოწყობაშიც დაეხმარება, რაც ნიშნავს მსოფლიოს სხვადასხვა ქვეყნიდან ბლოგერების და ინფლუენსერების ჩამოყვანას, რათა მათ გაიტანონ ინფორმაცია ჩვენი ტურისტული ღირშესანიშნაობების შესახებ ჩვენი ქვეყნის ფარგლებს გარეთ.
