დიდუბის რაიონში ბინათმესაკუთრეთა ამხანაგობებში ინფრასტრუქტურული პროექტების განხორციელება აქტიურ ფაზაშია. გამგეობის ინფორმაციით, ამ ეტაპზე, სადარბაზოების შიდა სარემონტო სამუშაოები სოხუმის ქუჩის N7-ში დასრულდა.
“სამუშაოების ფარგლებში, კედლები დამუშავდა და შემდგომ შეიღება. დიდუბის რაიონის გამგეობამ აღნიშნული სამუშაოები 10 743 ლარით დააფინანსა.
ანალოგიური ტიპის პროექტი ბათუმის ქუჩის N29 ა-შიც მიმდინარეობს, რომელიც დასკვნით ეტაპზეა და უახლოეს პერიოდში დასრულდება”, – განმარტავენ გამგეობაში.
ბინათმესაკუთრეთა ამხანაგობებში საერთო სარგებლობის ინფრასტრუქტურის მოწესრიგებას გამგეობა კვლავ 100%-ით აფინანსებს.
დაფინანსების მიღების პარალელურად, ამხანაგობა ვალდებულია, სამუშაოების ღირებულების 5% და ზოგ შემთხვევაში 10% შეაგროვოს და ამხანაგობის ანგარიშზე განათავსოს. აღნიშნული ინიციატივა მოსახლეობას საშუალებას აძლევს, დანახარჯის გარეშე მოიწესრიგოს საკუთარი საცხოვრებელი პირობები, ხოლო, ამხანაგობის ანგარიშზე განთავსებული თანხა სრულად მოახმაროს საერთო სარგებლობის ქონების მოვლა-პატრონობას.
