2021 წლის 8 თებერვლიდან გორში მუნიციპალური ტრანსპორტი ამუშავებდა. საკრებულოს გადაწყვეტილებით, ამ ეტაპზე, ტრანსპორტი, რომელიც მხოლოდ ქალაქის ტერიტორიაზე იმოძრავებს, მგზავრებს უფასოდ მოემსახურება. ამის შესახებ შიდა ქართლის საინფორმაციო ცენტრი წერს.
მერიის მიერ გამოქვეყნებული გრაფიკის მიხედვით, ყველაზე მეტი ავტობუსი იუსტიციის სახლის სიახლოვეს, გურამიშვილის ქუჩაზე მოხვდება. როგორ გაუძლებს დიდი ავტობუსების ნაკადს აღნიშნული ქუჩა, ეს ხვალიდან გამოჩნდება, თუმცა, როგორც მომხმარებლები სოციალურ ქსელში წერენ, ახალი გრაფიკი ყველაზე მეტად კომბინატის, კერძოდ შინდისის გმირების გამზირზე მცხოვრებ მოსახლეობის ინტერესებს არ ითვალისწინებს.
კერძოდ, შინდისის გამზირიდან გორის ახალ ავტოსადგურამდე არც ერთი ავტობუსი იმოძრავებს. ძველი ავტოსადგურის ნაცვლად ამჯერად ახალი ავტოსადგური, წმინდაწყლის დასახლებაში, ახალ ბაზართან გადავიდა.
,,ძალიან ბევრი პედაგოგი და მოსწავლე ცხოვრობს ამ უბანში, რომელსაც ტრანსპორტი ავტოსადგურამდე ჭირდება. ჩვენ ფაქტობრივად, ორჯერ უნდა გამოვიცვალოთ ტრანსპორტი, რომ ავტოსადგურში მოვხვდეთ. ასევე, მე პირადად, შემდეგ მესამე ავტობუსში უნდა გადავჯდე, რომლითაც ხურვალეთის სკოლაში უნდა წავიდე. ჩემ უბანში ცხოვრობს პედაგოგი, რომელიც ბერბუკში ასწავლის. ისიც ანალოგიურად უნდა გაწვალდეს,” – ამბობს ხურვალეთის საჯარო სკოლის პედაგოგი, ზიზი კურმაშვილი.
რაც შეეხება კერძო მიკროავტობუსებს, მათი ნაწილი გაუქმდება. როგორც კერძო სატრანსპორტო კომპანიის წარმომადგენელმა პედაგოგებს განუცხადა, ქალაქში ახალი ავტობუსების გამოჩენის შემდეგ, კერძო მიკროავტობუსების გარკვეული ნაწილი აღარ იმოძრავებს.
ახალ ავტობუსებს გორის მერიის მიერ დაფუძნებული კომპანია ,,გორის ტრანსპორტის სააგენტო” მართავს. დღევანდელი მდგომარეობით, ტრანსპორტის სააგენტოს 1,6 მლნ ლარი აქვს დაფინანსება. ამ კომპანიამ შესყიდვები 2021 წლის 29 იანვრიდან დაიწყო.
კერძოდ, შეიძინეს საკანცელარიო ნივთები, კომპიტერები და რეცხვის და სადეზინფექციო მომსახურება. 6 თებერვალს კი, კატალიზატორისთვის სითხე მოითხოვეს.
