ცქიტიშვილი: სარესტორნო სექტორი ჯერ კიდევ არის მაღალი რისკის შემცველი

827

რეგიონული განვითარებისა და ინფრასტრუქტურის მინისტრის, მაია ცქიტიშვილის განცხადებით, სარესტორნო სექტორი ჯერ კიდევ არის მაღალი რისკის შემცველი, ამიტომ ხელისუფლება ცდილობს კორონავირუსთან დაკავშირებით დაწესებული რეგულაციები იმ სფეროში შეამსუბუქოს, რომელიც შედარებით ნაკლები საფრთხის შემცველია.

როგორც მან მთავრობის ადმინისტრაციაში მოლებისა და სავაჭრო ცენტრების წარმომადგენლებთან გამართული შეხვედრის შემდეგ ჟურნალისტებს განუცხადა, ხელისუფლების ამოცანაა შეზღუდვები ისე შეამსუბუქოს, რომ ამან ეპიდვითარება კიდევ უფრო არ გააუარესოს.

„ეკონომიკა არ არის მხოლოდ სარესტორნო ბიზნესი. ეკონომიკა არის ყველა ბიზნესგარემოს ფუნქციონირება და პირველ რიგში, ეს უსაფრთხო უნდა იყოს. ჩვენ ძალიან კარგად გვახსოვს, როგორც სარესტორნო სფეროსგან, ასევე სავაჭრო ქსელისგანაც, როდესაც ნოემბერში შეზღუდვები ჯერ კიდევ დაწესებული არ გვქონდა და დღეში რამდენიმე ათასი ინფიცირებული გვყავდა, ამ დროს როგორც სარესტორნო, ასევე სავაჭრო ქსელის წარმომადგენლები ამბობდნენ, რომ 40-50%-ით უკვე შეუმცირდათ გაყიდვები. მხოლოდ იმის გამო, რომ ქვეყანაში ინფიცირების ასეთი მაღალი მაჩვენებელია, ეკონომიკის გამართულ ფუნქციონირებაზე საუბარი ვერ იქნება. ამიტომ, დღეს ჩვენი ამოცანა არის შეზღუდვების მოხსნა ისეთი სახით, რომ კვლავ არ მივიღოთ ინფიცირების ათასი რაოდენობა დღეში. სწორედ ამაზე ვსაუბრობთ, როგორ შეიძლება იფუნქციონიროს ბიზნესმა ისე, რომ უსაფრთხო იყოს ბიზნესის იპერირება ისე, რომ მოქალაქეების ჯანმრთელობა არ დავაზიანოთ. სარესტორნო სექტორი ჯერ კიდევ არის მაღალი რისკის შემცველი. სწორედ ამიტომ, ჩვენ ვიწყებთ ნაკლები საფრთხის შემცველი სექტორისგან, როგორიც არის, მაგალითად სავაჭრო სექტორი. როგორც კი ამ პროცესს ყველანი ერთად წარმატებით გავივლით, დამერწმუნეთ, სარესტორნო სექტორსაც და ტურიზმსაც ექნება საშუალება, სრულად აღდგეს“,- განაცხადა ცქიტიშვილმა.