რესტორატორთა ასოციაციის ვიცეპრეზიდენტის, შოთა ბურჯანაძის განცხადებით, მთავრობის მიერ რესტორნების მუშაობის შეზღუდვის გადაწყვეტილება შოკისმომგვრელი იყო და მთავრობის წარმომადგენლებთან შეხვედრების დროს მსგავსი შეზღუდვა არ განიხილებოდა.
როგორც შოთა ბურჯანაძემ რესტორნების მუშაობის შეზღუდვასთან დაკავშირებით მიღებული გადაწყვეტილების კომენტირებისას განაცხადა, აღნიშნული შეზღუდვის შედეგად სექტორში მომუშავე 250 000 ადამიანი უმუშევარი დარჩება.
„ეს გადაწყვეტილება უარყოფითად შეიძლება შეფასდეს სფეროს გადასახედიდან. ძირეული პრობლემა გვაქვს, ერთი მხრივ, მძიმე ეპიდვითარება ქვეყანაში, მეორე მხრივ, ის გადაწყვეტილება, რომელიც მიღებული იქნა, ასევე ადამიანების სიცოცხლესთანაა დაკავშირებული, დაახლოებით 250 000 ადამიანი ზარალდება ამ შეზღუდვით და სამსახურს კარგავს. ჩვენ მთავრობას შეხვედრების დროს ვთავაზობდით, რომ ოქროს შუალედი მოგვენახა. ეს ურთულესი გადაწყვეტილებაა და ჩვენი შეთავაზება იყო, რომ არსებული რეგულაციების მკაცრი კონტროლი მომხდარიყო და თუ ვინმე არღვევდა მოთხოვნებს, მკაცრად ეგო პასუხი, მაგრამ მთავრობამ სრული „ლოკდაუნის“ გადაწყვეტილება მიიღო. შეხვედრისას საუბარი არც ყოფილა სრულ შეზღუდვაზე, ასეთი ვერსია არც განიხილებოდა. შოკისმომგვრელი იყო ეს გადაწყვეტილება. „ლოქდაუნს“ ვუწოდებთ თუ წერტილოვან შეზღუდვას, რას დავარქმევთ ამ შეზღუდვებს ეს უმნიშვნელოა“, – აღნიშნა შოთა ბურჯანაძემ.
მისივე თქმით, ეპიდვითარების დასტაბილურების შემთხვევაში რესტორნები 70 % ვეღარ გაიხსნება. რაც შეეხება „დელივერის“ და „დრაივის“ სერვისების მუშაობის დაშვებას, შოთა ბურჯანაძის განცხადებით, რესტორნები მუშაობის მსგავს რეჟიმზე ვერ გადაეწყობიან.
„რომელიმე რესტორანმა გატანის სერვისი რომ ააწყოს, თუ მანამდე ასაქმებდა 20 ადამიანს, ახლა მაქსიმუმ 3-ს დაასაქმებს. გასათვალისწინებელია, რომ გატანის სერვისზე მუშაობენ სწრაფი კვების ობიექტები, თუმცა რესტორნები ვერ გადაკეთდებიან სწრაფი კვების ობიექტებად და თუ გადაკეთდებიან, ხარჯი მეტი ექნებათ, ვიდრე ბრუნვა. ვერ იმუშავებენ, თუმცა კიდევ უფრო მეტი პრობლემაა ის, რომ უამრავი ადამიანი სამსახურს დაკარგავს და ამ პერიოდის გასვლის შემდეგ, თუ ეპიდსიტუაცია დარეგულირდა, რესტორნების 70% უბრალოდ ვერ გაიხსნება, რადგან მათ ნულიდან კი არ მოუწევთ დაწყება, არამედ მინუსიდან. ბაზრიდან გავლენ, რადგან მოიჯარეები ამ პერიოდში თანხას მაინც მოითხოვენ, ამიტომ ფართებს დატოვებენ. პრობლემა იმაშია, რომ სახელმწიფო რეგულაციების გამართულად მუშაობას ვერ უზრუნველყოფს და აქედან გამომდინარეა მიღებული ეს გადაწყვეტილება“, – აღნიშნა მან.
რაც შეეხება მთავრობის გადაწყვეტილებას, რომ სარესტორნო ბიზნესს, რომელსაც საბანკო სასესხო ვალდებულება გააჩნია, სახელმწიფო საპროცენტო განაკვეთს დაუსუბსიდირებს, რესტორატორთა ასოციაციის ვიცე-პრეზიდენტის შეფასებით, „შექმნილ ვითარებაში ნებისმიერი დახმარება მისაღებია და დადებითია, მაგრამ თუ ბიზნეს სექტორი მიიღებს ამ დახმარებას სესხების სუბსიდირებასთან დაკავშირებით, ეს იმ 250 000 ადამიანს, ვინც უმუშევრად დარჩება, შვებას ვერ მისცემს.“
შეგახსენებთ, რომ კოორნავირუსის გავრცელების პრევენციისთვის ხვალიდან, 28 ნოემბრიდან, დამატებითი შეზღუდვები ამოქმედდება. 28 ნოემბერიდან 31 იანვრის ჩათვლით კი რესტორნები და კვების ობიექტები მთლიანად გადადიან გატანის სერვისზე. კერძოდ, დასაშვებია: პროდუქტის გატანა ე.წ. takeaway, „დელივერი“, „დრაივი“.
