7 თვის განმავლობაში თქვენთან ერთად შევძელი მნიშვნელოვანი საკითხების გადაჭრა ქალაქისთვის და ჩვენი მოქალაქეებისთვის,-ამის შესახებ ქუთაისის მერის მოვალეობის შემსრულებელმა დავით ერემეიშვილმა მუნიციპალიტეტის საკრებულოს სხდომაზე სიტყვით გამოსვლისას განაცხადა.
ქუთაისის მუნიციპალიტეტის მერიის ინფორმაციით, ქუთაისის მერის მოვალეობის შემსრულებელი დავით ერემეიშვილი მუნიციპალიტეტის საკრებულოს 36-ე სხდომას დაესწრო. იმის გათვალისწინებით, რომ ქუთაისს ჰყავს ახალი, არჩეული მერი, დავით ერემეიშვილი ვიცე-მერის თანამდებობას დაუბრუნდება. მან სამადლობელი სიტყვით მიმართა საკრებულოს დეპუტატებს:
„7 თვის მანძილზე, როცა მე ქუთაისის მერის მოვალეობას ვასრულებდი, თქვენთან ერთად გავიარეთ ქვეყნისთვის ურთულესი პერიოდი, პანდემიის გათვალისწინებით. ამ თვეების მანძილზე, ყოველთვის ვგრძნობდი თქვენს თანადგომას და ჩვენი თანამშრომლობით ქუთაისისთვის, ჩვენი მოქალაქეებისთვის ბევრი პრობლემის მოგვარება შევძელით. მე რამდენიმე დღეში დავუბრუნდები ჩემს თანამდებობას და თქვენთან თანამშრომლობას ისევ ქუთაისის მერის პირველი მოადგილის რანგში გავაგრძელებ“,- განაცხადა დავით ერემეიშვილმა.
