სახელმწიფო უსაფრთხოების სამსახური განცხადებას ავრცელებს, რომლითაც გავრცელებულ ინფორმაციას ეხმაურება, რომ სახელმწიფო უსაფრთხოების სამსახურის კუთვნილი ავტომანქანით ხორციელდება კონკრეტული პოლიტიკური პარტიის წარმომადგენლის თვალთვალი.
„გვსურს გამოვეხმაუროთ, გავრცელებულ ინფორმაციას, თითქოს სახელმწიფო უსაფრთხოების სამსახურის კუთვნილი ავტომანქანით ხორციელდება კონკრეტული პოლიტიკური პარტიის წარმომადგენლის თვალთვალი. გავრცელებულ ვიდეომასალაში ნაჩვენები ავტომობილი, სახელმწიფო ნომრით: SZ-303-SZ სახელმწიფო უსაფრთხოების სამსახურის საინფორმაციო ანალიტიკური დეპარტამენტის თანამშრომლის საკუთრებაა. საშვი, რომელიც დაფიქსირებულია ავტომობილის წინა საქარე მინაზე, გაიცემა სახელმწიფო უსაფრთხოების სამსახურის ავტოსადგომით სარგებლობისათვის, როგორც სამსახურის ბალანსზე არსებული, ასევე თანამშრომლების პირად საკუთრებაში არსებულ ავტომობილებზე”,- აღნიშნულია განცხადებაში.
ცნობისთვის, “ლელოს” ისნის ოლქის მაჟორიტარი დეპუტატობის კანდიდატმა ლანა გალდავამ წინასაარჩევნო კამპანიაში ხელის შეშლის კონკრეტულ ფაქტებთან დაკავშირებით ბრიფინგი გამართა და წინასაარჩევნო ზეწოლაში სუს-ის აქტიურ ჩარევაზე ისაუბრა.
