ლაილაში-ონი-უწერის მარშრუტი შესაძლოა, ებრაული მემკვიდრეობის ევროპული მარშრუტის ნაწილი გახდეს

2263

ონში ისრაელის სახლის დელეგაცია მუნიციპალიტეტის მერის მოვალეობის შემსრულებელს დავით ჩიკვაიძესა და ადგილობრივი თვითმმართველობის წარმომადგენლებს შეხვდა. ინფორმაციას ონის მერია ავრცელებს.

მათი ინფორმაციით, მხარეთა შორის მიღწეული შეთანხმების გათვალისწინებით, ისრაელის სახლმა მერის მოვალეობის შემსრულებელს წარუდგინა ლაილაში-ონი-უწერის მარშრუტი, რომელიც ებრაული მემკვიდრეობის ევროპული მარშრუტის ნაწილი გახდება.

“ისრაელის სახლმა წარმოადგინა მონუმენტის პროექტი, რომელიც მიეძღვნება ჰოლოკოსტის მსხვერპლთ და ბატონი სერგი მეტრევლის ხსოვნას, რომელმაც რუსეთის ქალაქ კისლოვოდსკიდან ნაცისტური რეჟიმის მიერ დევნილი ებრაელები შეიფარა და რომელიც ერთადერთი ქართველია, ვისაც იერუსალიმში მდებარე ჰოლოკოსტის მუზეუმმა „იად ვა-შემმა” მიანიჭა „ერთა შორის მართლის” („ხასიდეი უმმოთ ჰა-ოლამ”) წოდება.

შეხვედრის შემდეგ, მერის მოვალეობის შემსრულებელი დელეგაციის წევრებთან ერთად ეწვია ონის მხარეთმცოდნეობის მუზეუმს, სადაც დაცულია მდიდარი ებრაული მემკვიდრეობა, ონის ისტორიულ სინაგოგას, ქალაქის ებრაულ კვარტალს, ებრაელთა სასაფლაოს და ბე’ერ შევას სკვერს. ისრაელის სახლი გეგმავს მხარი დაუჭიროს ონის მუნიციპალიტეტის მერიას ებრაული კვარტლისა და მიმდებარე ტერიტორიების რეაბილიტაციის პროცესში. ამის შემდგომ, სტუმრებმა გადაინაცვლეს სოფ. უწერაში, სადაც ისრაელის სახლის წარმომადგენლებს საშუალება მიეცათ დაეთვალიერებინათ სერგი მეტრევლის სახლი, სადაც ის დევნილ ებრაელებს იფარავდა. მხარეები გეგმავენ, ითანამშრომლონ ხსენებული ადგილის განახლების პროექტის შექმნის მიმართულებით.

ვიზიტის დასასრულს, ონის მერის მოვალეობის შემსრულებელი და ისრაელის სახლის დირექტორი შეთანხმდნენ კოორდინირებულ მუშაობაზე ებრაული კულტურის ევროპული დღეების საორგანიზაციო საკითხებთან დაკავშირებით, რომელიც 2020 წლის 2 სექტემბერს, ქ. ონში გაიმართება”, – ნათქვამია მერიის ინფორმაციაში.

ცნობისთვის, ისრაელის სახლის დელეგაცია ევროპაში ებრაული მემკვიდრეობის დაცვისა და პოპულარიზების ასოციაციის წევრი და ევროპის საბჭოს ეგიდით დამტკიცებული ებრაული მემკვიდრეობის ევროპული მარშრუტის წარმომადგენელია.