ქალაქ თელავში მდებარე პროფესიული კოლეჯი „პრესტიჟი”-ს სრული რეაბილიტაცია აქტიურად მიმდინარეობს.
განათლების, მეცნიერების, კულტურისა და სპორტის მინისტრის მოადგილე თამარ ქიტიაშვილი კახეთის სახელმწიფო რწმუნებულთან და თელავის მუნიციპალიტეტის მერთან, ერთად, კოლეჯში მიმდინარე სარეაბილიტაციო სამუშაოებს ადგილზე გაეცნო.
კოლეჯში აცხადებენ, რომ სასწავლო კორპუსის რეაბილიტაციისათვის საქართველოს განათლების, მეცნიერების, კულტურისა და სპორტის სამინისტროსგან მიიღეს დაფინანსება 2 647 125,49 ლარის იდენობით. აღნიშნული სამუშაოები მოიცავს: ძირითადი სასწავლო კორპუსის სრულ რეაბილიტაციას, გარე სპორტული მოედნის მშენებლობა-მოწყობას, შენობის მიმდებარე ტერიტორიის კეთილმოწყობას.
თამარ ქიტიაშვილის ინფორმაციით, სამინისტროს ხელშეწყობით კოლეჯში დამატებით იგეგმება სტუდენტთა საერთო საცხოვრებლის მშენებლობა-მოწყობა, აგრეთვე გარე სახელოსნოების მშენებლობა და აღჭურვა შესაბამისი მატერიალურ-ტექნიკური რესურსით.
მისივე განმარტებით, შენობის, სასწავლო სახელოსნოებისა და ლაბორატორიების სამშენებლო სამუშაოების დასრულების და მათი სრული აღჭურვის შემდგომ კოლეჯი დაიმატებს და განახორციელებს შრომის ბაზარზე მოთხოვნად, რეგიონისათვის პრიორიტეტულ შემდეგ მიმართულებებს: აგრარული, სოფლის მეურნეობის, ბიზნესის ადმინისტრირების, ჯანდაცვის, ინფორმაციისა და კომუნიკაციის, მომსახურების სფეროს სხვადასხვა პროფესიულ საგანმანათლებლო პროგრამებს.
„პროფესიული კოლეჯი პრესტიჟი განაგრძობს ფუნქციონირებას ოქტომბრის თვიდან, ახალი პროფესიებით, ახალი პროგრამებით. ეს არის სრულიად თანამდეროვედ აღჭურვილი და რეაბილიტირებული კოლეჯი, რომელიც სდუდენტებს შესთავაზებს საინფორმაციო ტექნოლოგიების, საინჟინრო, ტურიზმისა და მასპინძლობის მიმართულებით განახლებულ პროგრამებს. ვფიქრობ, რომ თელავისთვის და მთლიანად კახეთის მოსახლეობისთვის ძალიან მნიშვნელოვანი სიახლეა. იმედი გვაქვს, რომ კოლეჯი შეძლებს და შესთავაზებს ახალგაზრდებს და ზრდასრულებს მათ საჭიროებებზე მორგებულ მრავალფეროვან სერვისებს. რეაბილიტაციის დასრულების შემდეგ, განათლების, მეცნიერების, კულტურისა და სპორტის სამინისტრო გააგრძელებს კოლეჯის განვითარებაზე ზრუნვას და ჩვენ მოვაწყობთ ექსტრა-კულიკულური აქტივობების დასანერგად მრავალფეროვან გარემოს, სხვადასხვა კლუბებს და ხელშემწყობ აქტივობებს სტუდენტების საინტერესო ცხოვრების მხარდასაჭერად,“ – აღნიშნა თამარ ქიტიაშვილმა.
კახეთის გუბერნატორის, ირაკლი ქადაგიშვილის თქმით, კახეთის რეგიონისთვის ძალიან მნიშვნელოვანია კვალიფიციური კადრის არსებობა მზარდი ეკონომიკის პირობებში.
,,დიდი მნიშვნელობა აქვს ქალაქ თელავში ამ კოლეჯის რეაბილიტაციას. მიმდინარე სარეაბილიტაციო სამუშაოები განგრძობადია – მოხდება სახელოსნოებისა და პერსპექტივაში, საერთო საცხოვრებელის დამატება. აღსანიშნავია, რომ აქ დანერგილი პროფესიები მორგებულია იმ საჭიროებებს, რა საჭიროებებიც ჩვენ ადგილზე გაგვაჩნია. ამავდროულად, ძალიან საინტერესოა ის გარემოება, რომ გვინდა საერთაშორისო თანამშრომლობა უკვე გამოცდილ პროფესიულ კოლეჯებთან, უცხოეთში კარგად აპრობირებული გაცვლითი პროგრამების დასანერგად,“- აღნიშნა ირაკლი ქადაგიშვილმა.
თელავის მუნიციპალიტეტის მერის, შოთა ნარეკლიშვილის თქმით, აღნიშნული სამუშაოების პარალელურად უწყება კოლეჯის მიმდებარე ტერიტორიებზე სხვა ინფრასტრუქტურულ სამუშაოებს ახორციელებს.
„თელავის პროფესიული სასწავლებელი „პრესტიჟის” სრული რეაბილიტაცია მიმდინარეობს, პარალელურ რეჟიმში, თელავის მუნიციპალიტეტის მერია ახორციელებს კოლეჯის გარე პერიმეტრზე არსებული სანიაღვრე არხებისა და ავტო-პარკინგის კეთილმოწყობას. აღნიშნული სამუშაოები აგვისტოს თვეში დასრულდება,“- აღნიშნა შოთა ნარეკლიშვილმა.
