„საქართველოს ფოსტამ“ 2019 – 2020 წლის მარკების თემატური გეგმის ფარგლებში, „ეროვნული გმირი“ – ჟიული შარტავას მარკა გამოსცა.
როგორც „ინტერპრესნიუსს“ „საქართველოს ფოსტიდან“ აცნობეს, მარკის ვიზუალში წარმოდგენილია ჟიული შარტავას პორტრეტი, რომლის ავტორია მხატვარი თამაზ ხუციშვილი, ხოლო ფონზე გამოსახულია ეროვნული გმირის ორდენი და ჟიული შარტავას სახელობის მთა.
„ჩვენთვის მეტად საპასუხისმგებლო და საამაყოა საქართველოს ეროვნული გმირის, ქართველი პოლიტიკური, სახელმწიფო და საზოგადო მოღვაწის ჟიული შარტავას მარკის გამოცემა, ამგვარად ჩვენ შევძლებთ მისი ღვაწლი და დამსახურება გავაცნოთ მთელ მსოფლიოს“, – განაცხადა საქართველოს ფოსტის გენერალურმა დირექტორმა ლევან ჩიკვაიძემ.
„საქართველოს ფოსტის“ ინფორმაციით, მარკა დაიბეჭდა საფრანგეთში, მსოფლიოში ერთ-ერთ ყველაზე მაღალპოლიგრაფიულ სტამბაში Cartor Security Printing-ში.
საქართველოს ფოსტის ინფორმაციით, მარკის დიზაინი გიორგი ქართველიშვილმა შექმნა და მისი ნომინალური ღირებულება 2,40 ლარს შეადგენს, წარმოდგენილია ერთმარკიანი მცირე ფურცლით და გამოიცა 25 000-იანი ტირაჟით. საფოსტო მარკა მიმოქცევაშია და მისი შეძენა შესაძლებელია საქართველოს ფოსტის სერვისცენტრებში მთელი საქართველოს მასშტაბით.
საფოსტო მარკა, ისევე როგორც დროშა და გერბი აღიარებულია ქვეყნის სიმბოლოდ. მარკის მეშვეობით ხდება ქვეყნებს შორის ინფორმაციის გაცვლა, რადგან ამ პატარა ზომის ფურცელზე ასახულია ქვეყნის ღირსშესანიშნაობები, გამოჩენილი პიროვნებები და მნიშვნელოვანი ფაქტები.
