სახელმწიფო აუდიტის სამსახურის მონაცემებით, 2018 წელს გორის მუნიციპალიტეტისთვის 10 ერთეული სამორიგეო ავტომანქანის ფლობა იყო რეკომენდირებული, თუმცა ამის მიუხედავად ქალაქის ხელმძღვანელობა 36 მანქანას განკარგავდა.
ამის შესახებ გორის მუნიციპალიტეტის მერიის 2017-2018 წლების შესაბამისობის აუდიტის ანგარიშშია ნათქვამი.
“2018 წლის 31 დეკემბრის მდგომარეობით, საბალანსო მონაცემების მიხედვით, მუნიციპალიტეტის საკუთრებაში ირიცხებოდა 36 ერთეული მსუბუქი და მაღალი გამავლობის სატრანსპორტო საშუალება.
მათ შორის: ა(ა)იპ-ებზე თხოვების ფორმით გადაცემული იყო 3 ერთეული, შსს-ზე – 7 ერთეული, გუბერნიაზე – ერთი ერთეული, დეპუტატის ბიუროზე – 2 ერთეული, გორის ეპარქიაზე – ერთი ერთეული სატრანსპორტო საშუალება. მერია განკარგავდა 22 ერთეულ მსუბუქ ავტომანქანას, აქედან 4 ერთეული ამორტიზებული იყო.
აუდიტის პირველადი ანგარიშის გაგზავნის შემდგომ, მუნიციპალიტეტმა წარმოადგინა საკრებულოს 2019 წლის 10 მაისის №91 განკარგულება, სამსახურებრივი უფლებამოსილების განსახორციელებლად საჭირო სატრანსპორტო საშუალებების ზღვრულ ოდენობასთან დაკავშირებით. ამ განკარგულებით 2019 წლიდან მანქანების რაოდენობა შესაბამისობაშია მთავრობის დადგენილებით რეკომენდებულ ზღვრულ ოდენობასთან”, – ნათქვამია აუდიტის ანგარიშში.
აქვე, უწყება გორის მუნიციპალიტეტს რეკომენდაციას აძლევს, გონივრულობის პრინციპის გათვალისწინებით, შეიმუშაოს და შეასრულოს წესი სამსახურებრივი უფლებამოსილების განსახორციელებლად საჭირო ავტოპარკის გადანაწილების, სატრანსპორტო საშუალებების კლასიფიკაციისა და შესყიდვის შესახებ.
