ხვალ, ქობულეთში კინტრიშისა და ქობულეთის დაცული ტერიტორიების ახალი ოფისი გაიხსნება. აჭარის ტურიზმისა და კურორტების დეპარტამენტის ინფორმაციით, შენობა ვიზიტორთა ცენტრს, მუზეუმის საგამოფენო სივრცეს, 4 სასტუმრო ნომერსა და კაფეტერიას აერთიანებს.
ვიზიტორთა ცენტრის პირველ სართულზე საგამოფენო სივრცე განთავსდება, რომელიც ეროვნული მუზეუმის დახმარებით მოეწყო. დამთვალიერებლებს საშუალება ექნებათ უკეთ გაეცნონ ისტორიას და ინფორმაციას ქობულეთისა და კინტრიშის დაცული ტერიტორიების, ბიომრავალფეროვნების და ტურისტული სერვისების შესახებ. შენობაში ასევე განთავსდება სასტუმრო, კაფე და საკონფერენციო დარბაზი.
„წელს საქართველოს სხვადასხვა რეგიონში უპრეცედენტოდ ბევრი ინფრასტრუქტურული სამუშაოები მიმდინარეობს. ინფრასტრუქტურის გაუმჯობესების მიზანია მომსახურების დონის ამაღლება და დაცული ტერიტორიების პოპულარიზაცია. ტურიზმის განვითარება მნიშვნელოვანია რეგიონისთვის და ხელს უწყობს ადგილობრივი მოსახლეობის სოციალურ-ეკონომიური მდგომარეობის გაუმჯობესებას“. – განაცხადა თომა დეკანოიძემ.
ქობულეთის დაცული ტერიტორიების ვიზიტორთა ცენტრის მშენებლობა კოლხეთის განვითარების ფონდის დაფინანსებით განხორციელდა. პროექტის ბიუჯეტი 1 284 000 ლარს შეადგენს. ახალი შენობა ქობულეთის ცენტრალურ ნაწილში, აღმაშენებლის 271 ნომერში მდებარეობს.
„ვიზიტორთა ცენტრი მნიშვნელოვანია ქობულეთის და აჭარის ზღვისპირეთის სტუმრების ინფორმირებისთვის და მთიანი აჭარით დაინტერესებისთვის. აღსანიშნავია, რომ დღეს ტურისტებისთვის აჭარა ძირითადად ზღვის კურორტს წარმოადგენს მაშინ, როდესაც ამ რეგიონს მრავალმხრივი ტურისტული პოტენციალი აქვს. ვიზიტორთა ცენტრის საშუალებით მოხდება ტურისტების ნაკადების აჭარის სოფლებისკენ მიმართვა (დაცული ტერიტორიების მიმდებარე მუნიციპალიტეტები). აღსანიშნავია ის ფაქტი, რომ დაცულ ტერიტორიებზე ვიზიტორების რაოდენობა დინამიკაში, ყოველწლიურად იზრდება“,- აცხადებენ აჭარის ტურიზმისა და კურორტების დეპარტამენტში.
მათივე ინფორმაციით, სტატისტიკის მიხედვით 2017 წელს, 2016 წლის ანალოგიურ პერიოდთან შედარებით, დაცული ტერიტორიების ვიზიტორთა რაოდენობა, 26%-ით გაიზარდა (2016-236 449; 2017-298 567). ასევე, 32%-ით გაზრდილია დაცულ ტერიტორიებზე უცხოელ ვიზიტორთა რიცხვი (2016-77 852; -2017-102 471). 2017 წელს დაცულ ტერიტორიებს ყველაზე მეტი ვიზიტორი გერმანიიდან, უკრაინიდან, პოლონეთიდან, ისრაელიდან და რუსეთიდან ეწვია. 2017 წელს, 6 თვის განმავლობაში, 2016 წლის 6 თვესთან შედარებით, ტურისტული სერვისებიდან მიღებული შემოსავლები 30%-ით გაიზარდა. ამასთანავე გაიზარდა დაცული ტერიტორიების მიმდებარე მუნიციპალიტეტებში არსებული ბიზნეს ინფრასტრუქტურა და დასაქმებულთა რაოდენობა. უშუალოდ კინტრიშისა და ქობულეთის დაცული ტერიტორიების ვიზიტორთა სტატისტიკაც მზარდია და 2016 წელს, კინტრიშის ეროვნულ ნაკრძალში ვიზიტორების რაოდენობა წინა წელთან შედარებით 36%-ით, ხოლო ქობულეთის დაცულ ტერიტორიაზე 5%-ით გაიზარდა.
„რეგიონში დაცული ტერიტორიების შექმნა არა მარტო ბუნების დაცვას, არამედ ტურიზმის განვითარებას, ქვეყნის პოპულარიზაციას გულისხმობს და პირდაპირ აისახება ადგილობრივი მოსახლეობის სოციალურ-ეკონომიკურ განვითარებაზე“, – აცხადებენ აჭარის ტურიზმისა და კურორტების დეპარტამენტში.
ქობულეთისა და კინტრიშის დაცული ტერიტორიები გამორჩეული და უნიკალურია. ქობულეთის დაცული ტერიტორიები საერთაშორისო მნიშვნელობის, უნიკალური, რამსარის კონვენციით აღიარებული ჭარბტენიანი ტერიტორიების დაცვის მიზნით 1998 წელს შეიქმნა. დღეისათვის, ქობულეთის დაცულ ტერიტორიებზე 3 ტურისტული მარშრუტია მოწყობილი. კინტრიშის დაცული ლანდშაფტი კი ტყეებისა და ენდემური სახეობების, ფლორისა და ფაუნის დაცვის მიზნით დაარსდა. გამორჩეულია ამ ტერიტორიაზე არსებული ათასწლოვანი უთხოვარის ხეები. კინტრიშს განსაკუთრებულ ელფერს, ეთნოგრაფიული სახლები სძენს. ასევე, კინტრიშის და მაჭახელას დაცულ ტერიტორიებზე შემორჩენილია ისტორიული, ულამაზესი თამარის თაღოვანი ხიდები, რომლებიც ბოლო წლებში ტურისტებისთვის მიმზიდველ ლოკაციად იქცა.
შენობა კოლხეთის განვითარების ფონდის და გერმანიის რეკონსტრუქციისა და განვითარების ბანკის ფინანსური მხარდაჭერით აშენდა და მოეწყო. ღონისძიებას საქართველოს მთავრობის, დონორი ორგანიზაციების, ადგილობრივი მუნიციპალიტეტების წარმომადგენლები, პარლამენტის და აჭარის მთავრობის წევრები და სხვა მოწვეული სტუმრები დაესწრებიან.
