2021 წლისთვის დედაქალაქში 15 ათას მაყურებელზე გათვლილი ახალი სპორტის სასახლე აშენდება, – ამის შესაძებ თბილისის მერმა, კახა კალაძემ, “ევრობასკეტი 2021-ის” მასპინძლობის უფლების მოპოვებისადმი მიძღვნილ საზეიმო ღონისძიებაზე განაცხადა.
ამასთან, მისივე თქმით, დედაქალაქი სრულ მზადყოფნაში იქნება, რათა 2021 წლის ევროპის საკალათბურთო ჩემპიონატის ჯგუფურ ეტაპს ღირსეულად უმასპინძლოს. კალაძის შეფასებით, მნიშვნელოვანია, რომ ასეთი დიდი სპორტული მოვლენა საქართველოში ჩატარდება, რაც ხელს შეუწყობს, როგორც ქვეყნის პოპულარიზაციას, ისე სპორტის განვითარებას.
“მე, როგორც ყოფილმა სპორტსმენმა, მინდა გაგიზიაროთ ჩემი მოსაზრება, რადგან მე გამოცდილი მაქვს, რას ნიშნავს, იყო სპორტსმენი, რამდენი შრომაა საჭირო წარმატების მისაღწევად, მაგრამ ერთია მონდომება და თავდაუზოგავი შრომა, თუმცა აუცილებელია გქონდეს ინფრასტრუქტურა და ხელშეწყობა. ჩვენი სახელმწიფო დგამს მნიშვნელოვან ნაბიჯებს, რათა სპორტის განვითარებას,
პოპულარიზაციას, ჯანსაღი ცხოვრების წესის დანერგვას ხელი შევუწყოთ. ამის მაგალითია ქვეყანაში განხორციელებული უამრავი პროექტი.
ასევე, მნიშვნელოვანია ისიც, რომ 2021 წლისთვის დედაქალაქში 15 ათას მაყურებელზე გათვლილი ახალი სპორტის სასახლე აშენდება.
მინდა, გითხრათ, რომ დედაქალაქი ყველა მიმართულებით მომზადებული იქნება, რათა 2021 წლის ევროპის ჩემპიონატს ღირსეულად უმასპინძლოს. დარწმუნებული ვარ, ჩვენი
კალათბურთელები ძალიან დიდ წარმატებას მიაღწევენ “, – განაცხადა კახა კალაძემ.
ცნობისთვის საქართველომ 2021 წლის ევრობასკეტის ჯგუფური ეტაპის მასპინძლობის უფლება 15 ივლისს, მიუნხენში გამართულ ფიბა ევროპის გენერალურ ასამბლეაზე მიიღო, რაც ნიშნავს, რომ საქართველოს საკალათურთო ნაკრები ავტომატურად მოიპოვებს ევროპის ჩემპიონატზე ასპარეზობის უფლებას, რომელიც ჩვენი გუნდისთვის მე-5 ევრობასკეტი იქნება.
