საქართველოს პრემიერმინისტრმა მამუკა ბატაძემ მთავრობის სხდომის დაწყებამდე გამართულ პრესკონფერენციაზე განაცხადა, რომ უკვე 20 სკოლაა გახსნილი, სადაც 800-ზე მეტი ბავშვი ქართულ პოლიფონიას და საგალობლებს ეუფლება. მისი თქმით, საქართველოში ფოლკლორისა და კულტურის კიდევ ექვსი ცენტრის გახსნა იგეგმება.
“ვფიქრობ, ეს არის სწორი და გამართლებული ნაბიჯი ჩვენი სახელმწიფოს ინტერესებიდან გამომდინარე. მე გავიზარდე ტრადიციულ ქართულ, ქრისტიანულ ოჯახში და მაქვს ჩემი ფასეულობები და ფასეულობათა სისტემა. მე ყოველთვის ვხელმძღვანელობდი მთავარი პრინციპით და ეს პრინციპი თქვა ყველა დროის ყველაზე დიდმა ქართველმა ილია ჭავჭავაძემ “აწმყო შობილი წარსულისაგან არის მშობელი მომავალისა”, რაც ჩემთვის ნიშნავს იმას, რომ ქვეყანა, ერი, რომელიც დაივიწყებს თავის ტრადიციებს, თავის ღირებულებებს, თავის ეროვნულ საგანძურს, ვერ ექნება მომავალი ისევე, როგორც მომავალი ვერ ექნება ერს, რომელიც არ იქნება ფოკუსირებული განვითარებაზე და მომავალზე. ეს არის ძალიან მნიშვნელოვანი პრინციპი, რითაც მე და ჩემი თანაგუნდელები ვხელმძღვანელობთ.
როდესაც ჩვენ ვსაუბრობთ ჩვენი ფოლკლორის განვითარებაზე, პოპულარიზაციაზე, პოლიფონია და საგალობლები ამის ნაწილია, რა თქმა უნდა, აქ ჩემი აზრით, შეფასება უნდა იყოს ერთმნიშვნელოვანი – ეს არის ქართული სახელმწიფოს ინტერესში და ეს არის ქართველი ხალხის ინტერესში.
მინდა გითხრათ, რომ უკვე 20 სკოლაა გახსნილი, სადაც 800-ზე მეტი ბავშვი ეუფლება ქართულ პოლიფონიას და საგალობლებს. კიდევ ექვსის გახსნას ვაპირებთ. დიახ, ეს იყო ჩვენი ეკლესიის ინიციატივა, რომელსაც ჩვენ გავითვალისწინებთ. უფრო მეტიც, მსურს კიდევ ერთხელ გავიმეორო, ყველგან, სადაც იქნება ჩვენი საზოგადოების თხოვნა, საქართველოში ჩვენ ნაბიჯ-ნაბიჯ გავხსნით ქართული ფოლკლორისა და კულტურის ცენტრებს იმიტომ, რომ ეს არის ქართული სახელმწიფოს ინტერესში, ქართველი ხალხის ინტერესებში”, – განაცხადა ბახტაძემ.
