ოზურგეთის მეერიის ინფორმაციით, ოზურგეთში ახალმა ავტოსადგურმა დაიწყო ფუნქციონირება. ავტოსადგური წულაძის ქუჩაზე მოეწყო და ძველი ავტოსადგურისგან განსხვავებით, ყველა საჭირო სტანდარტს აკმაყოფილებს. ავტოსადგური დღეს, ქალაქ ოზურგეთის მუნიციპალიტეტის მერმა ბეგლარ სიორიძემ და ვიცე-მერმა ალეკო ბურჭულაძემ დაათვალიერეს.
ამ დრომდე ავტოსადგური ქალაქგარეთ ფუნქციონირებდა, რაც მგზავრებისთვის და მძღოლებისთვის მნიშვნელოვან დაბრკოლებას ქმნიდა.
ახალი ავტოსადგური ქალაქის ცენტრში, მოქალაქეთათვის ყველაზე პრაქტიკულ ადგილზეა განთავსებული. აქვე გათვალისწინებულია განსაკუთრებული საჭიროების მქონე პირთათვის მნიშვნელოვანი სტანდარტები და შესაბამისად, ავტოსადგური მათთვის ადაპტირებულია.
ავტოსადგურის ახალი მდებარეობა ქალაქში ავტოსატრანსპორტო საშუალებების დგომისა და გაჩერების პრობლემებს დაარეგულირებს. ქალაქის სხვადასხვა ქუჩაზე თვითნებურად განთავსებული სამარშუტო ტაქსები შიდა და საქალაქთაშორისო მარშრუტებს ამიერიდან ახალი ავტოსადგურიდან განახორციელებენ.
აღნიშნული პროექტის განხორციელებამდე ქალაქ ოზურგეთის მუნიციპალიტეტის მერიაში ავტოსადგურის ადგილმდებარეობის შეცვლასთან დაკავშირებით საჯარო განხილვა მოეწყო, სადაც საზოგადოების სხვადასხვა სფეროს წარმომადგენლებმა ავტოსადგურის გადმოტანასთან დაკავშირებით იმსჯელეს და პროექტი დადებითად შეაფასეს“, – აღნიშნულია ოზურგეთის მერიის ინფორმაციაში.
წყარო: ინტერპრესნიუსი
