საქართველოს ტერიტორიული მთლიანობის აღდგენამდე, ქვეყნის ტერიტორიული მოწყობის საკითხი არ გადაისინჯება, – ამის შესახებ პარლამენტის თავმჯდომარემ, ირაკლი კობახიძე კონსტიტუციაში დაგეგმილი ცვლილებების საყოვეთაო-სახალხო განხილვისას განაცხადა.
”ტერიტორიულ მოწყობასთან დაკავშირებით სერიოზული მსჯელობა იყო. საბოლოო ჯამში გადავწყვიტეთ, რომ ის ძირითადი გზავნილი დაგვეტოვებინა, რომელიც საქართველოს კონსტიტუციაში ჯერ კიდევ 1995 წელს ჩაიდო. გზავნილის არსი იმაში მდგომარეობს, რომ ვიდრე საქართველოს ტერიტორიული მთლიანობა არ აღდგება, მანამდე ქვეყნის ტერიტორიული მოწყობის საკითხი არ გადაისინჯება. მხოლოდ მას შემდეგ, რაც საშუალება გვექნება, აფხაზეთისა და ცხინვალის რეგიონის მოსახლეობასთან ერთად გადავწყვიტოთ ჩვენი ქვეყნის ტერიტორიული მოწყობის საკითხი, ეს კონსტიტუციის დონეზე მოწესრიგდება. შესაბამისად, ეს გზავნილი ძალაში რჩება”, – განაცხადა ირაკლი კობახიძემ.
საკონსტიტუციო ცვლილებების საყოვეთაო-სახალხო განხილვა დღეს ქალაქ თელავში გრძელდება.
წყარო: ინტერპრესნიუსი
