თბილისის მერის კახა კალაძის განცხადებით, უახლოეს მომავალში ვასო გოძიაშვილის პარკის (ე.წ. წითელი ბაღი) კეთილმოწყობის სამუშაოები დაიწყება.
კალაძის თქმით, კონკრეტულ პროექტზე ტენდერი უკვე გამოცხადებულია და 25 ივნისს დასრულდება.
პარკის ტერიტორიაზე მოეწყობა 2 საბავშვო სათამაშო მოედანი, საპიკნიკე სივრცეები, ჭადრაკის დეკორატიული დაფა, „დეკის” ბილიკებით გამოყოფილი დასასვენებელი ზონები, სავარჯიშო ზონა, საგამოფენო ღია სივრცე, მცირე ზომის ღია კინოთეატრი და დახურული სივრცე კულტურულ-საგანმანათლებლო ღონისძიებების მოსაწყობად.
პარკის გარშემო მოეწყობა დაახლოებით 700-მეტრიანი ველობილიკი, სრულად შეიცვლება პარკში არსებული ფურნიტურა, განთავსდება სეპარირების ურნები და მოეწყობა ცხოველების სასეირნო სპეციალური სივრცე.
პარკში განახლდება გამწვანება: დაიგება ბალახის საფარი, დაირგვება სხვადასხვა სახეობის ბუჩქები და ხეები. გარდა ამისა, მოეწყობა სარწყავი სისტემა და განათება.
