განათლების სამინისტრო სოფლის სკოლებში კულტურულ-საგანმანათლებლო ცენტრების გახსნას აპირებს. განათლების მინისტრის მიხეილ ჩხენკელის განცხადებით, გაკვეთილების დასრულების შემდეგ სკოლები ადგილობრივი მოსახლეობისთვის ღია იქნება. ინფორმაციას “კახეთის ხმა” ავრცელებს.
“ჩვენ მივიღეთ სტრატეგიული გადაწყვეტილება. სოფლის სკოლები უნდა გახდეს კულტურულ-საგანმანათლებლო ცენტრები. კერძოდ, გაკვეთილების დასრულების შემდეგ სკოლები იქნება ღია მთელი სოფლის მოსახლეობისთვის, სადაც მათ შეეძლებათ გააგრძელონ განათლება თუ ამის სურვილი გააჩნიათ. ისწავლონ, გაიღრმავონ ცოდნა. აქ იქნება მრავალი კულტურული ღონისძიება. ეს სერიოზულ შედეგს მოგვიტანს. მთელი სოფლის მოსახლეობა ჩართული იქნება იმ სოფელში მდებარე სკოლის ცხვორებაში. ამ გზით მიიღწევა მთელი სიცოცხლის განმავლობაში განათლების მიღების უწყვეტობა“, – განაცხადა მიხეილ ჩხენკელმა.
განათლების მინისტრმა 7 მაისს სამინისტროს ახალი სამოქმედო სტრატეგია წარადგინა.
