ჩვენს მიერ გამოცხადებული ტენდერებით გვაქვს გარკვეული პრობლემები მეტროსადგურების რეაბილიტაციის თვალსაზრისით, ქართული კომპანიები არ იღებენ, ვერ იღებენ პასუხისმგებლობას ამ სამუშაოების ჩატარებაზე მას შემდეგ, რაც ვარკეთილის მეტროში მოხდა ჭერის ჩამოშლა და ჩამონგრევა, – ამის შესახებ თბილისის მერმა კახა კალაძემ თბილისის მთავრობის სხდომაზე განაცხადა.
მისი თქმით, თბილისის მეტროსადგურების განახლების პროექტზე, რომელიც მიზნად 11 მეტროსადგურის სრულ რეაბილიტაცია-განახლებას ისახავს, მუშაობა ევროპის განვითარებისა და რეკონსტრუქციის ბანკთან ერთად მიმდინარეობს.
„ყველა [ქართული] კომპანია ერიდება ამ პროექტებში მონაწილეობას, შესაბამისად, საერთაშორისო საფინანსო ორგანიზაციების ჩართულობით, მათი მხარდაჭერით მოხდება ტენდერების გამოცხადება 11 მეტროსადგურის რეაბილიტაციაზე და შესაძლებლობა ექნება საერთაშორისო, უცხოურ კომპანიებს მიიღონ მონაწილეობა ამ პროექტში,“ – დასძინა კალაძემ.
კალაძის განცხადებით, აღნიშნული პროექტი ბაქნის რეაბილიტაციას, მათ შორის ესკალატორების თანამედროვე მოდელებით განახლებას გულისხმობს.
როგორც თბილისის მერმა დასძინა, აღნიშნული პროექტის ღირებულება 44 000 000 ამერიკულ დოლარს შეადგენს.
