თელავში ჩოხელისა და ბახტრიონის ქუჩებს შორის რეკრეაციულ სივრცეებს აკეთებენ

263

ქალაქ თელავში, ჩოხელისა და ბახტრიონის ქუჩებს შორის არსებული ხევის მიმდებარე ტერიტორიაზე ურბანული განახლებისა და მრავალფუნქციური რეკრეაციული სივრცეების მოწყობის მიზნით სარეაბილიტაციო სამუშაოები დაიწყო.

თელავის მუნიციპალიტეტის მერიის ინფორმაციით, პროექტი აღნიშნული ბაღის სრულ რეაბილიტაციას და ახალი პარკის თანამედროვე სტანდარტების შესაბამისად მოწყობას ითვალისწინებს.

“რეაბილიტაციის ფარგლებში დაგეგმილია სპორტული, საბავშვო, გასართობი სივრცეების მოწყობა. პარკი სრულად ადაპტირებული იქნება შშმ პირთათვის. სარეაბილიტაციო სამუშაოების განხორციელებისთვის, რომელსაც ტენდერში გამარჯვებული კომპანია შპს “მშენსერვისი 55’’ ასრულებს, 3 356 834 ლარია გამოყოფილი.

პროექტი ხორციელდება საპილოტე რეგიონების ინტეგრირებული განვითარების პროგრამის და ადგილობრივი ბიუჯეტის თანადაფინანსებით, რომლის სტრატეგიული მიზანია თელავის ურბანული ტერიტორიის ინტეგრაცია, რეგიონულ ცენტრზე ხელმისაწვდომობის ზრდა და ურბანული ტერიტორიების განვითარება,რაც ხელს შეუწყობს თელავის როგორც რეგიონული ცენტრის განვითარებას’’,- აცხადებენ თელავის მუნიციპალიტეტის მერიაში.