Bus lane-ების ზოლში ტაქსებში ჩასასხდომად სპეციალური ადგილები მოეწყობა

387

Bus lane-ების ზოლში ტაქსებში ჩასასხდომად სპეციალური ადგილები მოეწყობა. შესაბამის საკანონმდებლო ცვლილებათა პაკეტზე რეგიონული პოლიტიკისა და თვითმმართველობის კომიტეტმა პირველი მოსმენით იმსჯელა. ცვლილების თანახმად, სპეციალურად მოწყობილ ადგილებზე ტაქსებს კანონიერად ექნებათ მგზავრთა ჩამოსმის საშუალება ისე, რომ საგზაო მოძრაობას და მგზავრებს დამატებითი საფრთხე არ შეექმნათ.

“ქალაქ თბილისის მუნიციპალიტეტში სამარშრუტო სატრანსპორტო საშუალებების მოძრაობისათვის განკუთვნილ ზოლში მსუბუქი ავტომობილის – ტაქსის (M1 კატეგორია) მგზავრთა ჩასხდომის ან/და გადმოსხდომის მიზნით გამოიყოფა მოძრაობის ან/და გაჩერების ადგილები, რითაც ტაქსის მძღოლებს შეეძლებათ უსაფრთხოდ უზრუნველყონ მოძრაობა, მგზავრთა ავტომობილში ჩასხდომა ან/და ავტომობილიდან გადმოსხდომა.

კანონპროექტის მიხედვით თბილისის მთავრობას ეძლევა უფლებამოსილება დაადგინოს და
თბილისის საკრებულოს დასამტკიცებლად წარუდგინოს სამარშრუტო სატრანსპორტო
საშუალებების მოძრაობისათვის განკუთვნილ ზოლში მსუბუქი ავტომობილის – ტაქსის (M1
კატეგორია) მგზავრთა ჩასხდომის ან/და გადმოსხდომის მიზნით მოძრაობის ან/და გაჩერების
ადგილები, რაც, თავის მხრივ, უზრუნველყოფს საგზაო მოძრაობის უსაფრთხოების დახვეწას”, – ვკითხულობთ განმარტებით ბარათში.

საკითხის წარდგენისას, პარლამენტის წევრმა მაია ბითაძემ განაცხადა, რომ საკანონმდებლო ცვლილების მთავარი მიზანია დედაქალაქში სატრანსპორტო პოლიტიკის ერთ-ერთი მნიშვნელოვანი საფეხურის, M1 კატეგორიის ავტომობილებისთვის, იგივე ტაქსებისთვის ავტობუსის ზოლში მგზავრების უსაფრთხო აყვანა-ჩამოსმის საკითხების დარეგულირება და საპარკინგე სისტემის გაუმჯობესება.

„საკანონმდებლო პაკეტი რამდენიმე ძირითადი მიმართულებისგან შედგება, პირველი და ყველაზე უმთავრესი სწორედ ტაქსების საავტობუსე ზოლში მოძრაობის კანონიერების საკითხია.
საავტობუსე ზოლები ეტაპობრივად მოეწყობა ყველა გამზირზე, შესაბამისად ტაქსებისთვის გარკვეულწილად რთულდება მგზავრების აყვანა – ჩამოსმის საკითხი. ავტობუსის ზოლში გაჩერებისთვის მოქმედი კანონმდებლობით ტაქსი ექვემდებარება დაჯარიმებას. აქედან გამომდინარე „ადგილობრივი თვითმმართველობის კოდექსში“ და პაკეტის სხვა კანონპროექტებში გათვალისწინებული ცვლილების შესაბამისად მუნიციპალიტეტს ექნება საშუალება, რომ საავტობუსე ზოლების მიმდებარე ტერიტორიაზე განსაზღვროს სპეციალური ადგილები ტაქსებისთვის, სადაც კანონიერად ექნებათ მგზავრთა ჩამოსმის საშუალება“, – განაცხადა ბითაძემ.

მისივე განმარტებით, ცვლილება, ასევე, ითვალისწინებს ჯარიმების კორექტირებას, ახალი ჯარიმების შემოღებას იმ შემთხვევებისას, რომლებიც საპარკინგე სისტემის გამართულად ფუნქციონირებას აფერხებს. კანონპროექტის მიხედვით გათვალისწინებულია ტროტუარზე ან ქვეითთა ბილიკზე გაჩერების ან დგომის შემთხვევაში ჯარიმის გაზრდა 10-დან 50 ლარამდე. ასევე, პარკირების წესების დარღვევის შემთხვევაში სატრანსპორტო საშუალება დაექვემდებარება სპეციალურ დაცულ სადგომზე გადაყვანას.

დისკუსიის შემდეგ, კომიტეტმა მხარი დაუჭირა საპარლამენტო ფრაქცია „ქართული ოცნების“ საკანონმდებლო ინიციატივის წესით წარდგენილ კანონპროექტებს „საგზაო მოძრაობის შესახებ“ საქართველოს კანონში ცვლილების შეტანის თაობაზე“, „საქართველოს ადმინისტრაციულ სამართალდარღვევათა კოდექსში ცვლილების შეტანის შესახებ“ და საქართველოს ორგანული კანონის პროექტი „საქართველოს ორგანულ კანონში „ადგილობრივი თვითმმართველობის კოდექსი“ ცვლილების შეტანის შესახებ“.