2022 წლის ბიუჯეტში გათვალისწინებულია მოსახლეობისთვის მნიშვნელოვანი პროგრამების გაზრდა, – აღნიშნა ფინანსთა მინისტრმა, ლაშა ხუციშვილმა.
მისი თქმით, მაქსიმალურადაა გათვალისწინებული პარლამენტში გამოთქმული წინადადებები და შენიშვნები. როგორც ლაშა ხუციშვილმა აღნიშნა, განახლებული პროგნოზების ფარგლებში მოძიებული დამატებითი რესურსები მიიმართება, როგორც მოსახლეობის სოციალური მხარდაჭერისთვის, ისე – ეკონომიკის განვითარებისთვის.
მინისტრის თქმით, მკვეთრად გამოხატული შეზღუდული შესაძლებლობების მქონე პირთა და 18 წლამდე შშმ ბავშვთა ყოველთვიური სოციალური დახმარება იზრდება 25 ლარით, ომში მონაწილე ვეტერანთა ყოველთვიური 22/44 ლარიანი დახმარება იზრდება 100 ლარამდე.
„გათვალისწინებულია სასწრაფო დახმარების ბრიგადებისა და სოფლის ექიმების/ექთნების ანაზღაურების 10%-იანი ზრდა, გათვალისწინებულია, ასევე, სახსრები მუნიციპალიტეტებში არსებული სასწრაფოს ბრიგადების ხელფასების თბილისში არსებულ ხელფასებთან გათანაბრებისთვის, ჯანდაცვის ახალი პროგრამების დაფინანსება, მათ შორის, სპინალური ატროპიის მქონე ბავშვთა დახმარების, დიაბეტის მქონე ბავშვებისთვის მუდმივი მონიტორინგის თანამედროვე აპარატების შესყიდვა, ასევე, გათვალისწინებულია ღვიძლისა და ძვლის ტვინის ტრანსპლანტაციის ოპერაციების თანადაფინანსება, გაზრდილია ბავშვთა ზრუნვის პროგრამების დაფინანსება, სოციალური მუშაკებისა და ფსიქოლოგების ანაზღაურება, გათვალისწინებულია სკოლის ადმინისტრაციული პერსონალის ხელფასების 10%-იანი ზრდა, ასევე, მანდატურებისა და სოციალური მუშაკების ხელფასების ზრდა. 2022 წლის ბიუჯეტში მოიაზრება მოსახლეობის მიზნობრივი ჯგუფების სოციალური დახმარებაც, რომელიც დაკავშირებულია სოციალურად დაუცველი თითოეული ბავშვის დახმარების 50 ლარიდან 100 ლარამდე გაზრდილი სოციალური დახმარების დაფინანსებასთან, COVID-19-ის მართვასთან დაკავშირებით ბიუჯეტი განსაზღვრულია 500.0 მლნ ლარით, დევნილთა საცხოვრებელი სახლებით უზრუნველყოფისა და მიგრანტთა ხელშეწყობისათვის გამოყოფილია ჯამურად 114,2 მლნ ლარი, ზოგადსაგანმანათლებლო დაწესებულებების ინფრასტრუქტურის განვითარებაზე – ჯამში 194.1 მლნ ლარამდე“, – განაცხადა მინისტრმა.
როგორც ლაშა ხუციშვილმა აღნიშნა, მოსახლეობის გაზიფიცირებისთვის 2022 წლის ბიუჯეტში გათვალისწინებულია – 73.6 მლნ ლარამდე, მეწარმეობის განვითარებაზე – 273.5 მლნ ლარამდე, ერთიანი აგროპროექტისთვის – 261.7 მლნ ლარი, საქართველოს რეგიონებში განსახორციელებელი პროექტების ფონდი 300.0 მლნ ლარს შეადგენს.
